💥Дыштанылга кидин түлүк
💥Дыштанылга кидин түлүк 📢Тывада өөреникчилерниң часкы дыштанылгазын бо чылын март 28-тен апрель 5-ке чедир Өөредилге яамызы бадылап каан. Уругларның айыыл чок чоруун хандырары-биле болгаш кем-херек, корум-чурум үрээшкиннерин баш бурунгаар болдурбазы-биле хемчеглерни ап, тус-тузунда харыысалгалыг кижилерни томуйлаан. Школа, класс аайы-биле ада-ие хуралдарын эрттиргилээн, бүдүн республиканың ада-ие хуралы онлайн хевирге болган. Ажы-төл айыыл-халапка таваржы бербезин, кем-херекке онаажы бербезин дээш, хайгааралды күштелдирип, хостуг үезин чөптүг ажыглаары-биле школаларда хемчеглер дыштанылга планы ёзугаар эртип турар. Культура, спорт албан черлеринде Түр үениң хостуг үе эрттирер төптери ажылдап, уругларны хаара тудуп турар. Бо часкы дыштанылгада 17 623 уругну 335 төпте хаара туткан. Өөредилге яамызынга хамааржыр 157 төп ажылдап турар, Культура яамызында – 134, Спорт яамызында – 29, Күш-ажыл болгаш социал политика яамызында – 15. Ада-иениң талазындан ажы-төлүн хайгааралга албайн баар, уруглар комендант шагын сагывайн баар, назы-хар четпээн уругларга арага аймаан садыптар чергелиг тургустунуп болгу дег нарын байдалдарны хынап, профилактиктиг рейдилерни чорудуп турар. Узун улдуңда өөренгеш, шылай берген уруг-дарыг дыштанылгазын солун, ажыктыг кылдыр эрттирип, чалгаараар чай албайн турар. А класс башкыларының ажылы кажангызындан артык шыңгыы апарган. Дыштанылга планынче янзы-бүрү спортчу хемчеглер, угаан сайзырадыр оюннар, экскурсиялар, кино, концерт, шии көрүлделери, номчулгалар, чогаал сайгарылгалары, уран-шевер кылыгларга мастер-класстар, солун ужуражылгалар, маргылдаалар, мөөрейлер кирип турар. Медээни болгаш чурукту Өөредилге яамызының парлалга албанындан алган. “Шын” № 12 2026 чылдың апрель 12