💥Бүзүрелдиг тыл
💥Бүзүрелдиг тыл 📢Тывада тускай шериг операциязында дайынчыларывыска гуманитарлыг дузаламчы чыыр ажыл уламчылавышаан. Бо чугула сорулгаже хүн бүрүде чаа-чаа коллективтер болгаш республиканың сагыш човаачал чурттакчы чону катчып турар. Бо удаада Улуг-Хем кожууннуң «мөңгүн волонтёрлары» биле Россияның көдээ ажыл-агыйының Тывада төвүнүң коллективи чедип келген. Тускай шериг операциязы эгелей бээрге-ле, Улуг-Хем кожууннуң Хайыракан сумузунуң чурттакчылары бүзүрелдиг тылды боттарынга хүлээп алган. Олар гуманитарлыг чүъктү белеткээринге идепкейлиг дузалажып, оңгу лааларын кылып, камгалал четкилерни өрүп турар. Бо хүнге чедир “Мөңгүн волонтёрлар” үш чүс дөртен четкини өрээн. Бо удаада олар гуманитарлыг дуза чыыр черге алды камгалал четкини, «панцирь» деп адаар шывыгларны чедирген. Россияның көдээ ажыл-агыйының Тывада төвүнүң коллективи чеди тактиктиг аптечканы дамчыткан. Шынарлыг эмнер болгаш херекселдер дайынчыларга автомат азы граната-биле бир дөмей чугула херек. Аптечканың иштин аштап-шарыыр материалдар, хачылар, аарыг намдадыр эмнер дээш оон-даа өске ажыктыг эм-таң-биле долдурган. Чыгдынган гуманитарлыг ачы-дуза чүъгүн Курск обласче болгаш чаа регионнарже чорудар. Гуманитарлыг дузаламчыны Тиилелге хүнүн таварыштыр чыггаш, май 9-ка чедир чедирер ужурлуг. Тываның Баштыңы бодунуң блогунда мурнуку одуругда дайынчылардан харыы — бүгү күжениишкинниң эң-не чугула үнелели дээрзин демдеглээн. Видео азы өөрүп четтиргенин илереткен медээ бүрүзү дуза чедер черинде үе-шаанда чедип турарын бадыткап турар. Бистиң корр. Буян ООРЖАКТЫҢ тырттырган чуруктары. “Шын” №10 2026 чылдың март 19