💥Чаражын дөзээн
💥Чаражын дөзээн 📢Дазылгага үш кыс хөөрежип олурганнар. Март 8-тиң байырлалы чоокшулап олурар болгаш, оларның кижи бүрүзү-ле авазын мактаар болган. Төрээш өстүрүп каан иезин кым-даа болза ынчанмайн канчаар. Авазынга белек кылдыр хол-хавы аргып олурган Белекмаа: – Мээң авам дыка аргыыр-дыр ийин – дээн. Даарап олурган хөйлеңин соксай тыртып кааш, Уран-кыс ора: – Мээң авам даараныр кижи – дигеш, ажылын катап уламчылай берген. Чүнү-даа кылбайн, анаа-ла чалгаарап орган Чойганмаа: – Мээң авам аргыттынар-даа, даараныр-даа, чараш-даа – дески кижи чүве – деп бодунуң үлүүнде чугаалаан. Өөрү соңнуг-мурнуг: – Сен аваңны дөзээн болгаш, чараш-тыр сен аа, эжим – дишкеннер. Чойганмаа туң дег ак диштерин көзүлдүр хүлүмзүрбүшаан: – Ындыг болганым ол ыйнаан – деп каан. Шынап-ла, Чойганмаа чүгле интернатта эвес, бүгү школада чараш кыстарның санынга кирер. Ол талазы-биле маргылдаа болур болза, аңаа киржирлерниң бирээзи. Ооң чүге дааранмазын, аргыттынмазын өөрү сонуургаарга, Чойганмаа дүште-даа чок: – Мен авамның чүгле чаражын дөзеп алган кижи-дир мен ийин, кыстар – дээш, база катап хүлүмзүрээш, улуг тынган. Кезек када соксай берген чугааны: – Аргыырынга авам өөредип каан – деп, Белекмаа катап эгелеп каан. – Авам даарап орган чүвезин салып каарга, тудуп алгаш, айтырып тургаш, өөренип алган мен – деп, Уран-кыс улаштырган. Чойганмаа чүнү-даа ыыттавайн олуруп берген. Чүгле чараш кижи ындыг-ла ыйнаан. / Кертик-оол ОРТУНАЙ. “Шын” №8 2026 чылдың март 5