Бии-Хем кожуунда хаван фермазын тудуп турар
Бии-Хем кожуунда хаван фермазын тудуп турар 📢2025-2030 чылдарда Тыва Республиканың социал-экономиктиг хөгжүлдезиниң бот-тускайлаң программазы ёзугаар «Восток Агро» КХН бүдүрүлгези долу күжү-биле ажылдаар хаван фермазын тудар инвестиция төлевилелин боттандырып турар. Тыва Республиканың Хөгжүлде фондузунуң специалистери бо неделяда объектини хынап, төлевилелди хайгааралда алган. Төлевилел 2024 чылдан ажылдап эгелээн. «Восток Агро» КХН бүдүрүлге ажыл-чорудулгазының шупту чадаларын, ооң иштинде тарылга ажылдарын болгаш мал чеминиң белеткелин, ол ышкаш хаваннар ажаап өстүрерин чорудуп турар. Бо ажылдың сөөлгү чадазы – эът болгаш эъттен кылган чаагай продукциязын садыг-саарылгаже киирген. Ажыл-агый артынчы чок ажылдаар болгаш чиг этти долузу-биле болбаазырадыр арганы ажыглап турар. Амгы үеде ферма 500 хаванныг, ооң баш санын 1000 чедирер планныг. Хаваннары эъткир болгаш чаглыг уксаалыг — ландрас биле тетрен. Чем кылдыр колдуунда бодунуң бүдүрген арыг чемнерин ажыглап турар. Бүдүрүлге бодунуң продукциязын бүдүрүп турар. Чижээ, ооң хаван, инек, аът эъдинден какпактаан эъди тускай сертификаттыг, 2025 чылда Россияда эң эки 100 продукцияның санынче кирген. Төлевилелде көрдүнгени ёзугаар бүдүрүлге 15 ажылчын олуттарны тургускан. Ажыл-агый Туранда «Мясная лавка» деп тускай садыын ажыдып, продукциязын таарымчалыг өртекке садып турар. Немелде бүдүрүлге шугумнарын оон-даа калбартып, манчы кылырын планнаан. ИПСЭР-ден 107,203 сая рубль субсидияны ап, көдээ ажыл-агый бүдүрүлгезин калбарткан. Ол күрүне деткимчези-биле хаван фермазын улгаттырып, аңгы азырал, дезинфекция кылыр, мал согар чер тудуунче ажыглаар планныг. «Восток Агро» КХН бүдүрүлгези объектини бо чылдың октябрь эгезинде ажыглалче киирер чөпшээрелди алырын планнаан, ооң соонда долу күчүзү-биле ажылдап эгелээр. Бистиң корр. Чуруктарны ТР-ниң Чазааның парлалга албанындан алган. “Шын” №8 2026 чылдың март 5