💥Чыраа кулун
💥Чыраа кулун Тоол 📢Бир-ле көже берген аалдың чуртунга чудаан Кулун оъттап турган. Кулунга Бөрү маңнап келгеш: — Сени мен чиир мен! — деп-тир. Кулун тургаш: — Мен моон ыраар эвес мен, чиирин-не чиир-дир сен, саяк Кулун мен, саяктадып-саяктадып алгаш, чи даан — деп мынчанган. «Саяктаары кандыг чүве ирги?» — деп бодааш, Бөрү мунуп-ла алган. Кулун саяктааш чоруп каан. Бөрүнү удудур саяктааш, ховуга аппарып чайып каапкаш, маңнап чоруткаш, база-ла оъттай берген. Бөрү удуп-удуп, оттуп кээрге, кулун удуду саяктааш, чайып каапкан, ховуда чааскаан чыдып-тыр. Кулун-даа чок болган. — Саяк аът мунар чылгычылар эвес мен? Ам-на барып чиптейн! — дээш, Бөрү халып чоруп-ла каан. Бөрү чедип кээрге, Кулун бо оъттап туруп-тур. — Сени ам-на чиир мен. — Чиирин-не чиир-дир сен, чыраалаар Кулун мен, чыраалаткаш, чивес сен бе? «Чыраалаары кандыг чүве ирги?» — деп бодааш, Бөрү Кулунну мунуп алгаш, чырааладып чоруп-ла каан. Кулун Бөрүнү удудур чыраалааш, ховуга чайып каапкаш, маңнап кээп, база-ла оъттап туруп берген. Бөрү оттуп келгеш: — Чыраа-саяк аът мунар чылгычылар эвес мен. Ам-на барып чиптейн! — дээш, халып-ла чоруткан. Бөрү маңнап кээрге, Кулун-даа оъттап турган. — Ам-на чиир мен! — Чиирин-не чиир-дир сен, челерим кончуг Кулун мен, челдирип-челдирип алгаш, мени чи даан! «Челери кандыг чүве ирги?» — дээш, мунупкан. Кулун база-ла Бөрүнү удуду челгеш, ховуга чайып каапкан. Боду маңнап кээп, оъттап туруп берген. Бөрү удуп-удуп, оттуп келген. Кулун чок. — Ядараан чыраа, саяк, челер аът мунар чылгычылар эвес мен, ам-на чип каайн — дээш, маңнап-ла чоруп каан. Маңнап кээрге, Кулун оъттап-ла туруп-тур. — Ам-на чиир мен сени, кулугур! — дээн. Кулун тургаш: — Харын чиирин-не чиир-дир сен, мээң будум таваңгайында бижик бар чүве, ону кыйгырып көргеш, чи даан! — деп-тир. «Чүү дээн чүве ир- ги?» — дээш, номчуур деп көрүп бар чыдырда, Кулун Бөрүнү чыттыр теп кааш, маңнап чоруй барып-тыр оо. Бөрү: «Бижик-үжүк билир бижээчи мен бе, чыраа-саяк, челер-маңнаар аът мунар чылгычы мен бе, тудуп чип алырым кай!» — деп халактап чыда, өлүп каап-тыр оо! / «Тываның челээжи» уругларга чечен чогаал сайтызындан алган. “Шын” №7 2026 чылдың февраль 26