💥Кара-Күске Чоодунуң кайгамчыктыг делегейи
💥Кара-Күске Чоодунуң кайгамчыктыг делегейи 📢Чөөн-Хемчик кожууннуң Теве-Хая сумузунуң чаарттынган ном саңынга Тываның уругларның алдарлыг чогаалчызы Кара-Күске Күнзекович Чоодунуң 90 харлаанынга тураскааткан эртем практиктиг конференция болуп эрткен. Чогаадыкчы хемчегге кожууннуң аңгы-аңгы сумуларындан ном саңнарының ажылдакчылары, номчукчулары, мѳгейикчилери, ниитизи-биле 12 кижи киришкен. Эртем-практиктиг конференцияның кол сорулгазы – уругларның алдарлыг чогаалчызының ажыл-амыдыралы, чогаадыкчы курлавыр байлаан аныяк-ѳскенге таныштырып дамчыдары. Конференцияның киржикчилери чечен-мергени-биле боттарының ажылын шииткекчилерге, келген чонга таныштырып, бедик деңнелге камгалап номчааннар. Киржикчилерни 2 бөлүкке чарган. Бирги бөлүкке 8-10 класстың ѳѳреникчилери, ийигизинге 18 хардан ѳрү назылыглар киришкен. Бирги бөлүкке 7 ѳѳреникчи ажылын камгалаан. Түңнелинде 3 тиилекчини илереткен. 1-ги черни Чыраа-Бажы школазының ѳѳреникчизи Дамырак Сарыглар, 2-гизин Хайыракан школазының ѳѳреникчизи Чинчи Кара-Сал, 3-кү черни Теве-Хая ортумак школазының ѳѳреникчизи Айрана Ховалыг чаалап алганнар. Ийиги бөлүктүң киржикчилериниң аразынга кожууннуң уругларның тѳп ном саңынын методизи Рада Монгуш тергиидээш, 1-ги черге төлептиг болган. Ийиги черге кожууннуң уругларның тѳп ном саңының библиотекары Чодураа Кара-Сал, а үшкүзүнге Хорум-Даг ортумак школазының башкызы Маргарита Шойдак база Теве-Хая ортумак школазының библиотекары Шончалай Ондар шылгарааннар. Тиилекчилерге ѳртектиг белектерни сөңнээн. Уругларның алдарлыг чогаалчызы Кара-Күске Чоодунуң чогаадыкчы байлакшылдыг, курлавыр тѳѳгүзүн киржикчилер, аалчылар ханы угаап, хѳй-ле чүүлдерни билип алганы ѳѳрүнчүг. Удаа-дараа эртем практиктиг конференцияларны эрттирип, чонга таныштырып билиндирери эргежок чугула. Байырмаа МОНГУШ. “Шын” №37 2026 чылдың сентябрь 24