Аҕам саастаахтар декадаларыгар
Аҕам саастаахтар декадаларыгар Ааспыты ахтан аастылар Киин бибилэтиэкэҕэ Хаҥалас улууһун муниципальнай архыыбын сэбиэдиссэйэ Ольга Соловьева уонна С.И. Жараев аатынан СӨ Аудиовизуальнай нэһилиэстибэтин национальнай киинин пуондатын сүрүн харайааччыта Анна Пшенникова Покровскай куорат аҕам саастаахтарыгар анаан Илин-Сибиирдээҕи кинохроника студията устубут Орджоникидзевскай оройуон сопхуостарын, Покровскайдааҕы кыылы иитэр ферма олоҕун, үлэһиттэрин сырдатар документальнай киинэлэри уонна Тимофей Стручков «Они сражались за Родину» диэн Улуу Кыайыы 40 сылыгар анаан Аҕа дойду сэриитин кыттыылаахтарын, бэтэрээннэри устан үйэтиппит съемкатын көрдөрдүлэр. - Биһиги бу киинэлэри таһынан бэйэбит муниципальнай архыыппытыгар харалла сытар фотоальбомнары илдьэн аҕам саастаахтарбытыгар көрдөрдүбүт. Үгүстэр урукку сылларга араас эйгэҕэ үлэлээн-хамсаан кэлбит биир дойдулаахтарын, аймахтарын, төрөппүттэрин, билэр дьоннорун көрөн астыннылар, ааспыты ахтан аастылар. Анна Пшенникова СӨ Аудиовизуальнай нэһилиэстибэтин национальнай киинин үлэтин билиһиннэрдэ. Сорохторго билигин даҕаны араас сылларга устубут, түһэрбит киинэ, хаартыска пленкалара бааллар эбит, олору хайдах цифровой формакка таһаарар туһунан ыйыталастылар, сүбэ-ама ыллылар, - диэн Ольга Васильевна иһитиннэрдэ. Ольга Гермогенова. Хаартыскалары Ольга Соловьева тиксэрдэ. @gazetahangalas Газета «Хангалас» в МАХ: https://max.ru/channel_Hangalas ВКонтакте: https://vk.com/gazetahangalas