МОЛИТВА СВЯТИТЕЛЮ ИОАСАФУ
МОЛИТВА СВЯТИТЕЛЮ ИОАСАФУ О священная главо, благодати Святаго Духа исполненная, святителю отче наш Иоасафе! Ты во дни жития земнаго учил еси паству иноческую обители Сергиевы Троицу почитати Святую, соединену убо существом, разделену же ипостасьми; ты словесное брашно паче мирскаго возлюбил еси: научи и нас в вере истинней крепко стояти и радостно тещи к поучению словес Божественных. Ты на свещнице всея Руси в годы смятения ея возсиял еси, яко светильник светозарный и свеща светоприемная; ты твердым исповеданием явился еси яко столп церковный, веры крепкое основание, богатство некрадомое благочестия: помози и нам коемуждо свое служение усердно и чисто совершати во утверждение Церкве нашея и отечества. Ты посреде князей, яко един от пророк древних, слово правды Христовы вещал еси и рознь умирял еси ненавистную мира сего; ты дар правления стяжал еси Руси Державныя на единение: умоли Бога сохранити ю непоколебиму в вере Православней и от злых наветник необориму. Ты был еси обидимых заступник, печальных утешитель, душ многих врач искусный и учитель изрядный: сподоби и нас милостивое сердце ко всем имети и разум духовный, во еже како подобает страждущим помощи. Ты страдания и изгнание горькое претерпел еси: укрепи и нас, егда аще что от недоведомых найдет на ны, не поколебатися от прилогов врага злаго, но уготовитися и не смутитися во испытание грядущее. Ты в нашествии иноплеменных небоязненно за правое дело стояти вся поучал еси: избави землю Русскую и обитель нашу от всякаго обстояния и варварскаго нахождения и вразуми нас от слуха зла не боятися, но право ходити пред Богом. Тебе убо просим: сохрани нас от недуга и глада, от нестроений и смуты, от мятежа и междоусобныя брани, от разделения и еретическаго возстания, исцели нас, ко гробу твоему приходящих, от всякия болезни душевныя и телесныя, от страстей свободи и души наша просвети. Да возстанем и исправимся, да спасемся и Царства Небеснаго достигнем, идеже купно с тобою прославим Отца, и Сына, и Святаго Духа, Троицу Единосущную во веки веков. Аминь.