"Ийэкээм сыдьаайар сырдыга": Дьоруой Ийэ Ксения Илларионовна Жиркова төрөөбүтэ 100 сыл...
"Ийэкээм сыдьаайар сырдыга": Дьоруой Ийэ Ксения Илларионовна Жиркова төрөөбүтэ 100 сылыгар аналлаах Ийэ күнүн көрсө дьоро тэрээһин ыытылынна. Саха Өрөспүүбүлүкэтин Ийэ күнүн көрсө, улууспутугар сүдү суолталаах, умнуллубат түгэн буолла. «Ийэкээм сыдьаайар сырдыга” диэн Дьоруой Ийэ, Саха АССР үтүөлээх учуутала, Саха АССР Верховнай Сэбиэтин икки төгүллээх депутата, учуутал, уопсастыбаннай диэйэтэл Ксения Илларионовна Жиркова төрөөбүтэ 100 сылын чэрчитинэн, улуустааҕы киин библиотекаҕа Ийэ олоххо аналын тула истиҥ сэһэргэһии дьоро киэһээтэ ыытылынна. Бу дьоһуннаах тэрээһиҥҥэ Бүлүү куоратын баһылыга, Ксения Илларионовна сиэнэ Ян Анатольевич ыалдьыттаата. Тэрээһин иннигэр Ян Анатольевиһы кытта көрсөн кэпсэттибит, инники былааннары үллэһиннибит. Ийэ күнүн көрсө ыытыллыбыт дьоро тэрээһин сүрүн сыала-соруга – олоххо дириҥ көрүүлээх, үтүө ыччаттары төрөтөн, иитэн таһаарбыт Дьоруой Ийэ, Ксения Илларионовна дьоһуннаах олоҕун, үтүө үлэтин саҥа көлүөнэ ыччакка, эдэр ийэлэргэ билиһиннэрии. Кини олоҕун холобура – ыччат кэскилигэр, уопсастыба сайдыытыгар төһүү күүс буолар. Тэрээһиҥҥэ улууспут Дьоруой Ийэлэрэ, көхтөөх активист эдэр ийэлэр кыттыыны ыллылар. "Санаа Ситимэ" литературнай түмсүү Ийэ туһунан истиҥ хоһооннорунан тэрээһини арыйан, мустубут дьон дууһаларын таарыйда. Эдэр активист ийэлэр көхтөөхтүк сэһэргэһиигэ кыттан, бэйэлэрин санааларын, сүбэлэрин-амаларын, олохторун уопутун үллэһиннилэр. Бу маннык тэрээһиннэр – биһиги улууспут сиэрдээх сайдыытыгар, ыччакка патриотическай иитиини биэриигэ, дьиэ кэргэн сыаннастарын бөҕөргөтүүгэ улахан суолталаахтар. #ДеньМатери #ИйэКүнэ max.ru/channel_VNikolaev