11-13 сентябрьыште «Лесная сказка» комплексыште школ лесничестве-влакын регион-влак кок...
11-13 сентябрьыште «Лесная сказка» комплексыште школ лесничестве-влакын регион-влак кокласе слётышт лиеш. Слет эрла, 11 сентябрьыште, 13 шагатлан почылтеш. Тушко Марий Эл, Татарстан республикла да Угарман кундем гыч 81 тунемше чумырга. Икымше кечын участник-шамыч чодыра ушем мастерскойыш ушнат. Тудо «Илыш гыч ик кече... » темылан пӧлеклатше творческий заданий почеш эрта. Тушто куд йогын лиеш: «Чодыра таксаций», «Чодырам аралымаш. «Чодыран оролжо»,«Чодырам шындымаш», «Чодыра науко», «Заповедный вер-влак». Мастарлык класс деч вара ӱдыр-рвезе-влак «Волгенче» туныктымо рӱдерын еҥже-влак ден вашлиймаш, квест сынан модыш вучат, а школ лесничестве-влакым вуйлатыше-шамыч семинарыш да «Настольная книга школьных лесничеств» модышыш чумыргат. Кокымшо кечын многоборье эрта. Тудо кӱшнӧ ончыктымо куд йогын почеш лиеш. Участник-шамыч многоборьеште тыгай личный зачетышто посна направленийыште мастарлыкыштым ончыктат. Кумшо кечын конкурсым иктешлат да слётым пайремлын петырат.