Марий Эл гыч самырык активист-влакын делегацийышт Ульяновск областьыште эртыше Российыс...
Марий Эл гыч самырык активист-влакын делегацийышт Ульяновск областьыште эртыше Российысе калык-влак ассамблейын «Код единство» икымше молодёжный профильный сменышкыже ушнен. Тудо 26-31 октябрьыште йоча тазалыкым пеҥгыдемдыме да туныктымо «Рвезылык» («Юность») рӱдерыште эрта. «Код единство» смене Российысе калык-влакын икоян улмо идалыклан келыштаралтын да общероссийский гражданский идентичностьым пеҥгыдемдышаш, тӱвыра-влак кокласе вашкылым вияҥдышаш да участник-влакым элнан йӱлажын поянлыкше дене палдарышаш. Программыште — социальный проектирований, Юл кундемысе калык-влакын тӱвырашт нерген ӱстембал модышым ыштымаш, медиаконтент дене мастер-класс да калык-влакын келшымашыштлан пӧлеклалтше проект-влак дене команде дене пашам ыштымаш. Сменын пашашкыже Марий Элым вуйлатыше Юрий Зайцев, Российысе калык-влак ассамблейын Марий Элысе пӧлкажым вуйлатыше Лариса Яковлева, Марий Эл Правительстве председательын икымше алмаштышыже- Марий Элым вуйлатышын администрацийжым вуйлатыше Лидия Батюкова, Марий Эл Правительстве председательын алмаштышыже-тӱвыра, савыктыш да калык-влакын пашашт шотышто министр Константин Иванов ушненыт. Вес ийын тыгаяк сменым Марий Эл Республикыште эртараш палемдыме. Тидын нерген Российысе калык-влак ассамблейын генеральный директоржо Азат Латыповын республикыш толын коштмыж годым кутырен келшыме. Тудо республикысе вуйлатыше-влак дене самырык-влакын проектыштым илышыш шыҥдараш полшымо да калык-влак кокласе келшымашым пеҥгыдемдыме йодышым каҥашен. Кундемыштына смене «Лесная сказка» базыште лиеш. Тушко элнан 20 регионжо гыч 60 участник толшаш. Фотом Марий Эл вуйлатышын пресс-службыжо деч да Российысе калык-влак ассамблейын Марий Элысе пӧлкажын воткыл лаштыкше гыч налме.