НАУМ ТРИФОНОВИЧ ТӨРӨӨБҮТ АЛААҺЫГАР МЭҤЭ БЭЛИЭ АРЫЛЫННА
НАУМ ТРИФОНОВИЧ ТӨРӨӨБҮТ АЛААҺЫГАР МЭҤЭ БЭЛИЭ АРЫЛЫННА Судаарыстыбаннас күнүн көрсө Таатта улууһугар, Тыараһа уонна Октябрьскай нэһилиэктэр икки ардыларыгар федеральнай трасса кытыытыгар турар кэрэ айылҕалаах Чээнньийэ алааска Улуу Кыайыыны уһансыбыт ини-бии Слепцовтарга аналлаах МЭҤЭ БЭЛИЭ үөрүүлээх аһыллыыта ыытылынна. Бу сүҥкэн үлэни Наум Трифонович чугас дьоно-сэргэтэ иилээн-саҕалаан ыыттаран улууска бэлэх ууннулар. Чуолаан сиэнэ Екатерина кэргэнинээн Петр Герасимовтыын моой-арҕас ылсан, үлэлэһэн, архитектор Нонна Герасимова эскиһигэр олоҕуран, улуус салалтата, Тыараһа, Чөркөөх дьоно-сэргэтэ өйөөн мэҥэ бэлиэ силигин сиппит. Чээнньийэ алаастан, буор сыбахтаах балаҕантан сэриигэ аттаммыт, тыылга эйэлээх олоҕу уһансыбыт ини биилэр уобарастарын туруйа гынан көрдөрбүттэр. Мэҥэ бэлиэ дьүһүнэ-бодото, быһыыта-таһаата балаҕаны санатар. Наум Трифонович Кыайыы үбүлүөйдээх сылларыгар өрүү сэргэ туруорарын санааннар, алтан сэргэ инники күөҥҥэ турара ураты өйдөбүллээх. Үс бииргэ төрөөбүттэр сырдык мөссүөннэрэ гранит тааска түһэриллэн, ааттара-суоллара толору суруллан, бэлиэ кэннигэр бу алаастан сэриигэ аттаммыт уолаттар ааттара эмиэ суруллан, үйэлэргэ өлбөөдүйбэт, үрдүк суолталаах мэҥэ бэлиэ буолбут. Бу күн Наум Трифоновичка, кини оҕолоругар, сиэннэригэр, аймахтарыгар туһаайан улуус баһылыга Айаал Бурцев, Октябрьскай нэһилиэк баһылыга Олег Ушницкай, Тыараһа баһылыгын солбуйааччы Туналы Солко, аймахтарын аатыттан В.И.Ленин аатынан Уолба орто оскуолатын директора Алексей Аржаков, икки нэһилиэк олохтоохторо, Наум Трифонович үөрэппит оҕолоро, биир дойдулаахтара истиҥ эҕэрдэ, махтал тылларын тиэртилэр. Тэрээһин долгутуулаах түгэнинэн 102 саастаах сэрии кыттыылааҕа Наум Трифонович кэлбит дьоҥҥо-сэргэҕэ, төрөөбүт улууһугар уонна үүнэр көлүөнэҕэ анаабыт сырдык, дириҥ ис хоһоонноох алгыһа буолла. Тэрээһин Николай Трифонович сиэнэ Алексей Аржаков таһаарыытыгар сомоҕолоһуу оһуохайынан, өйдөбүнньүк хаартыскаҕа түһүүнэн түмүктэннэ. //Сиһилии суруйууну уонна фоторепортаһы "Таатта" хаһыат сайтыгар уонна хаһыатыгар ааҕыҥ. @taattagazeta @ulusmedia