Босхо сымыыт түҥэтилиннэ
Босхо сымыыт түҥэтилиннэ Алтынньы 15 күнүгэр Сүлэ нэһилиэгин Ийэ түмсүүтүн салайааччыта Матрена Прокопьевна Евсеева көҕүлээһининэн анал байыаннай дьайыы кыттыылаахтарын дьиэ кэргэттэригэр уонна «Эрэл» түмсүү чилиэннэригэр туһуламмыт 82-с үтүө дьыала акцията ыытылынна. Кэлэн иһэр Саха Өрөспүүбүлүкэтин Ийэлэрин уонна Арассыыйа Аҕаларын күннэрин көрсө, нэһилиэк уопсайа 24 ыалыгар биирдии ячейка сибиэһэй сымыыт босхо түҥэтилиннэ. Бу улахан суолталаах, туһалаах тэрээһини олоххо киллэрэргэ хас да сыл устата Сүлэ нэһилиэгин Ийэ түмсүүтүн кытта ыкса үлэлэһэр, куруук үтүө санаа илиитин ууна турар эрэллээх спонсорбытыгар — Ньурбатааҕы Көтөр фабрикатын генеральнай директорыгар Петр Иннокентьевич Гаврильевка уонна тэрилтэ кэлэктиибигэр Сүлэ олохтоохторун аатыттан барҕа махталбытын тиэрдэбит! Эһиги ураты кыһамньыгыт уонна өйөбүлгүт бу уустук кэмҥэ күүс-тирэх, улахан көмө буолар. Марина Герасимова @gazetanyurba @ulusmedia