Кэрэ ситим – ийэ оҕотунаан
Кэрэ ситим – ийэ оҕотунаан Ийэ… Олус да истиҥник, сырдыктык иһиллэр ытык тыл. Хас биирдиибитигэр бу орто дойдуга саамай чугас, күндү киһибит — күн күбэй ийэбит буолар. Биһигини итии тапталынан биһиктээн, үтүө киһи гына иитэн, олох киэҥ суолугар үктэннэрэр ийэттэн ордук кэрэ сир үрдүгэр ким баарый? Ийэттэн саҕаланар киһи төрдө, аал уот уонна алаһа дьиэ сылааһа. Кини сылаас мөссүөнүн хас биирдиибит сүрэҕэр үйэлэргэ илдьэ сылдьар, кини уурбут күүстээх тапталын уонна ахсаабат кыһамньытын хаһан да умнубат ытык эбээһинэстээхпит. Алтынньы 17 күнүгэр Сүлэ нэһилиэгэр Саха Өрөспүүбүлүкэтин Ийэлэрин күнүгэр анаммыт, ийэ уонна оҕо ураты ситимин, дьиэ кэргэн үтүө үгэстэрин уонна ас астыыр үөрүйэхтэрин арыйар «КЭРЭ СИТИМ – ИЙЭ ОҔОТУНААН» диэн кулинарнай күрэс бэрт сэргэхтик ааста. Тэрээһини «Айыы Тайбыт» култуура киинин уонна олохтоох бибилэтиэкэ үлэһиттэрэ үрдүк таһымнаахтык тэрийэн ыыттылар. Күрэскэ барыта үс ийэ оҕолорунаан көхтөөхтүк кытыннылар. Кинилэр бэйэлэрин билиһиннэриигэ, «Биһиги бастыҥ бүлүүдэбит» дьиэтээҕи ас күрэҕэр, «Интеллектуальнай винегрет» сытыы өйдөөхтөр, «Хараҕынан быһа холоон» уонна түмүктүүр «Сандалы» түһүмэхтэргэ күрэстэстилэр. Кыттааччылар бары да мааны асчыт буоланнар, бэлэмнээбит астара бииртэн биир минньигэс буолан дьүүллүүр сүбэни уонна көрөөччүлэри сөхтөрдө. Cиһилии саайтка ааҕыҥ: https://xn--90adptbcs3gya.xn--p1ai/kere-sitim-ije-o%d2%95otunaan/ @gazetanyurba @ulusmedia