Төрээн кожуунунда дыштанып келген башкыларывыс.
Төрээн кожуунунда дыштанып келген башкыларывыс. Бо хүннерде Бай-Тайга кожуунга шажын университединиң аныяк башкызы, очулдурукчу Сун-Доржу Салчак (өскен төрээн чери Шуй сумузу) база Хертек Чингис, Гьялцен Лоден башкы (өскен төрээн чери - Кара-Хөл) дыштанып чедип келгеннер. Олар- кайызы-даа Индияда Дрепунг Гоманг хүрээзиниң тергиин өөредилгелиг сургуулдары. Лама башкыларывыс төрээн кожуунунга келгеш, дыштанылгазының үезинде дооскан школаларынче аалдап, башкылар, өөреникчилерге база чонга чылыг-чымчак, үнелиг, өөредиглиг, ужуражылганы эрттирерин бодап турарлар. Бөгүн олар Бай-Тайга кожууннуң удуртулгазы-биле ужуражылганы кылып, боттарының күзел-бодалдарын үлешкеннер. Хүндүлүг башкыларывыстың, чаңгыс чер-чурттугларвыстың тускай, улуг эртем-билиглиг кижилер болуп, буянныг мергежилди чедип ап чоруурунга бай-тайгажылар чоргаарланып, эки өөредилгени, ам-даа улуг-улуг чедиишкиннерни, ак орукту, бедик сүлдени күзеп каалыңар.