Чурапчы улууһун олохтоохторун, аатырбыт сылгыһыт дьоммут удьуордарын, күн бүгүн үлэлии-... — 20 июня 2026 г. в 23:21:46.319
Чурапчы улууһун олохтоохторун, аатырбыт сылгыһыт дьоммут удьуордарын, күн бүгүн үлэлии-хамсыы сылдьар бука бары сылгыһыттары, ат сүүрдээччилэри, ыһыахпыт дьоһун-мааны ыалдьыттарын Саха сирин бастакы Социалистическэй үлэ Дьоруойа, Ленин аатынан уордьан кавалера, “Сиэрпэ уонна балта” Кыһыл Сулус хаһаайына, биир дойдулаахпыт, аатырбыт сылгыһыт Роман Иннокентьевич Константинов-Дьоруой Арамаан сырдык аатыгар анаммыт улууспут ыһыаҕын үрдүк үөрүүлээх күнүнэн улуус салалтатын уонна тус бэйэм ааппыттан итиитик, истиҥник эҕэрдэлиибин! Сылгы иитиитэ – үйэттэн үйэҕэ бэриллэн кэлбит өбүгэбит ытык дьарыга. Саха омуга, сылгы иитиитэ уонна Дьөһөгөй Айыыта - норуот дириҥ силистээх, баай ис хоһоонноох төрүт култууратын, духуобунаһын, итэҕэлин тулхадыйбат ытык тирэхтэрэ. Өбүгэбит сылгы тула Дьөһөгөй Айыы тыынынан үөскэппит өлбөт-сүппэт үгэстэрин, үтүөкэннээх сиэрин-туомун кэрэһилиир ыһыахпыт саха олоҕун оҥкулун олохтуу, барҕарда, киэргэтэ, үйэтитэ турар улуу аналлаах. Ытык ыһыахпытыгар Чурапчы улууһа былыргыттан бүгүҥҥэ диэри сылгы иитиитигэр айымньылаах үлэнэн үүнэн-сайдан кэлбит кэрэ-бэлиэ суолун бэлиэтиибит. Онуоха Чурапчыны Чурапчы дэтэн, үтүө аатын үрдэппит, сайдыы суолугар дабаппыт биир дойдулаахпыт Социалистическай үлэ Дьоруойа Роман Константинов томороон тымныыттан, өҥүрүк куйаастан толлубат чахчы да дьоруойдуу уонна айымньылаах үлэтинэн киллэрбит кылаата кэмнэммэт сүүнэ, сүдү. Роман Иннокентьевич өбүгэ үөрүйэхтэригэр тирэҕирэн, байытан үлэлээбит тус уопута күн бүгүн улууспутугар сылгыны иитиигэ, бары сылгыһыттарга тирэх буолан, бу салааны сайыннарыыга күүс-көмө буола турарыгар махтанабыт, сүгүрүйэбит. Бу дьоһун суолталаах ыһыахха Дьоруой Арамаанынан сирэйдээн араас кэмнэргэ тахсыылаахтык үлэлээбит улууспут туруу үлэһит сылгыһыттарыгар сылаас, истиҥ махтал тылларын аныыбыт. Бүгүн - үрдүк Айыыларга, чуолаан, Дьөһөгөй Айыыга анаан сүгүрүйэр, айгыр-силик айылҕабытын кытта алтыһар дьоро күммүтүгэр бар дьоммут өйө-санаата түмүллэр, үс кута бөҕөргүүр, өрөгөй талаана арыллар. Үлэ Дьоруойун уруйдуур үрүҥ тунах ыһыахпыт арчылыыр-харыстыыр күүстээх алгыһынан күрүөлэнэн, улууспутугар биллэрбит Оҥорон таһаарыы сылыгар сыспай сиэллээхпитин сыһыы аайы сырыырҕатан, хороҕор муостаахпытын дэлэтэн, күөх сайын бэрсэр уйгутун сомсон, чэгиэн, чэбдик туруктаах, үөрэ-көтө олох дьолун айан-тутан, бука бары этэҥҥэ дьоллоохтук олороргутугар баҕарабын! Уруй! Туску!