Улуус салалтатын саҥа нэдиэлэтээҕи планерката сэлээркэнэн хааччыллыы боппуруоһуттан саҕ... — 6 июля 2026 г. в 04:58:57.203
Улуус салалтатын саҥа нэдиэлэтээҕи планерката сэлээркэнэн хааччыллыы боппуруоһуттан саҕаланна. Биллэрин курдук, “Туймаада нефть” тэрилтэ сыананы 106 солк. тиэртэ уонна чааһынайдарга атыыга таһаара илик. Улуус өттүттэн кэпсэтии быһыытынан, Мырыла, Арыылаах, Бахсы курдук нэһилиэктэргэ уоннуу тонна атыыламмыт. Ону таһынан “Агроснаб” тэрилтэтин кытта кэпсэтиинэн «Хатан” ХЭТ 15 тоннаны ыларга “Туймаада нефть” тэрилтэтин кытта дуогабардаспыт. Онон күн аайы 23 л. ылыахтаах. Планеркаҕа уматыгынан хааччыйыы боппуруоһугар тэриллэн үлэлиири өрөспүүбүлүкэ оперативнай штабыгар улуус дьаһалтатыттан окко киириигэ хас биирдии хаһаайыстыбаҕа 20 л. биэрэргэ сайаапка киирэн турарын туһунан иһитиннэрдилэр. Олоҥхо ыһыаҕар Чурапчы улууһуттан Никита Софронов хапсаҕайга абсолютнай чөмпүйүөн, Татьяна Дьячковская 75 кг. мас тардыһыыга дьахталларга муҥутуур кыайыылаах буоллулар, Кай Адамов үс төгүл үс ыстаныыга иккис миэстэ буолла. Олоҥхо ыһыаҕар улуус кыттыытын түмүктэрин уонна ЕГЭ туттарыытын туһунан кэлэр планеркаҕа сиһилии кэпсиэхтэрэ. Бу күннэргэ нэһилиэктэр окко киирэллэр. Ол эрэн от ыйын 18 чыыһылатыттан ый аҥара барыта ардах диэн турар. Улуус үрдүнэн баһаартан сэрэхтээх буолуу боппуруоһа хонтуруолга турар. Атын улуустары ылан көрдөххө, Эдьигээн улууһугар 14, Нерюнгри диэки 11 баһаар бэлиэтэнэр. Үүммүт нэдиэлэҕэ автотранспорт, “Илин” эко-парк” концепциятын, “Таежный герой” байыаннай-спортивнай куонкуруска кыттыы боппуруостарыгар сүбэ мунньахтар буолуохтара итиэннэ саҥа киирбит сокуонунан дьокутааттар куоластааһыннарынан Соловьев нэһилиэгин баһылыгынан талыллыбыт Иван Иванович Брызгаев дуоһунаһын тутар сиэрэ-туома ыытыллыа. Полиция сводкатынан уопсайа 57 сайабылыанньа киирбититтэн улахан аҥара микрокредитнэй тэрилтэлэртэн кирэдьиит ылан баран төлөөбөт дьоҥҥо үҥсүүлэр киирбиттэр. Икки оҕо икки велосипеды уорууларынан бэрэбиэркэ бара турар. ГАИ өттүнэн 238 массыына бэрэбиэркэлэммититтэн 54 административнай боротокуол толоруллубут. Массыына, мотоцикл уруулугар бырааба суох олоруу, суол быраабылатын кэһии түмүгэр массыынаны штрафстоянкаҕа туруоруу, түүҥҥү патруль рейдэтинэн арыгы иһэн баран сылдьыылар, төрөппүт эбээһинэһин толорбот буолуу, икки оҕо матассыыкылынан сылдьан тутуллуулара бэлиэтэммит. Маны сэргэ планеркаҕа Даайа Амматыгар сылгылар оҕону тэбэн эчэтиилэрэ тахсыбытын ыйан туран, маннык түбэлтэ тахсыбатын наадатыгар нэһилиэк баһылыктара сылгылары дэриэбинэ таһыгар тутуу туһунан дьаһал таһааралларыгар этилиннэ.