Бүгүн улууспутугар мэтээлинэн бүтэрбит уонна биир кэлим эксээмэннэргэ үрдүк көрдөрүүлэр... — 21 июля 2026 г. в 08:35:50.240
Бүгүн улууспутугар мэтээлинэн бүтэрбит уонна биир кэлим эксээмэннэргэ үрдүк көрдөрүүлэри ылбыт оҕолорбутун чиэстээтибит. Быйыл Чурапчыбытыгар хаһан да буолбатах үрдүк ситиһиилэр кэллилэр. Ону 15 кыһыл көмүс, 13 үрүҥ көмүс уонна 3 выпускник 100 баалы ылбыттара бэлиэтиир. Баһылык буолуохпуттан үөрэх хаачыстыбатын үрдэтиигэ сүрүн болҕомтобун ууран, араас хайысхалаах үлэни тэрийбиппит. Онтон биирэ 2025-2026сс. үөрэх дьылын саҥатыгар оҕолорго уонна учууталларга көҕүлүүр күүһү, өйөбүлү оҥорор сыалтан балаһыанньаны олохтообутум. БКЭ-ни 80-тан үөһэ баалга туттарбыкка, 9-с кылааһы түмүктүүр эксээмэннэри 5 предмеккэ муҥутуур баалы ылбыт оҕолорго уонна кинилэр учууталларыгар бириэмийэ ананарын эппитим. Күн бүгүн бу хайысхалар бары түмүллэн, түмүктээхтэрин уонна инникилээхтэрин көрдүбүт. 100 баалга 3, 80-тан үөһэ 16 выпускник туттарда уонна 9-с кылааһы 6 оҕо бастыҥ көрдөрүүнэн түмүктээтилэр. Кинилэргэ уонна учууталларыгар бириэмийэбитин үөрүүлээх быһыыга-майгыга туттардыбыт. Бу курдук инникитин да үрдүк көрдөрүүлэр, ситиһиилэр кэлэ туралларыгар баҕарабын. Выпускниктарга баҕарбыт үөрэхтэригэр киирэн үөрэнэн, дойдубут сайдарын туһугар үтүө үлэһит дьон буолан тахсалларыгар алгыспын аныыбын.