Быйыл Култуура сылыгар Андрей Саввич Борисовка, Россия норуодунай артыыһыгар, ССРС уонн... — 5 августа 2026 г. в 04:24:36.197
Быйыл Култуура сылыгар Андрей Саввич Борисовка, Россия норуодунай артыыһыгар, ССРС уонна Россия Судаарыстыбаннай бириэмийэлэрин лауреатыгар, "Кыһыл көмүс мааска" хаһаайыныгар, Россия Президенин Ыйааҕынан Үлэ Дьоруойун үрдүк аата иҥэриллибитинэн эрийэн эҕэрдэлээн, кэпсэтэ сырыттым. Андрей Саввич култуура миниистиринэн үлэлии сылдьан, онтон атын да кэмнэргэ Чурапчы улууһугар өрүү сылдьан, кини сириттэн-уотуттан, дьонуттан-сэргэтиттэн үтүө санаалары сахтан, ииттинэн, сүрдээх күүстээх эрчими ылбытыгар, култуура эйгэтигэр айымньылаахтык бииргэ үлэлээбит-хамсаабыт дьонугар-сэргэтигэр барҕа махталын тиэрдэр. Бу үрдүк ааты иҥэрии Саха сирин уонна дойду култууратын барҕардыыга Андрей Саввич киллэрбит сыаналаммат сүҥкэн кылаатын билинии буолар. Кини үйэ чиэппэрэ кэмҥэ өрөспүүбүлүкэ култууратын уонна духуобунай сайдыытын миниистиринэн сөҕүмэр айымньылаахтык уонна тахсыылаахтык үлэлээбит кэмнэрэ, Култуура уонна ускуустуба судаарыстыбаннай институтун итиэннэ Олоҥхо тыйаатырын төрүттээбит үрдүк үтүөтэ умнуллубат. ЮНЕСКО тэрилтэтэ олоҥхону киһи аймах тылынан уус-уран чыпчаал айымньытынан билиниитэ уонна саха киинэтэ атаҕар туруута кини аатын кытта быһаччы сибээстээх. Бэйэтин театральнай оскуолатын төрүттээбит биһиги кэммит уһулуччулаах режиссера, хас да көлүөнэ артыыстары уһуйан таһаарбыт настаабынньык күн бүгүн Эпос уонна ускуустуба Арктическай киинин иилээһиҥҥэ-саҕалааһыҥҥа далааһыннаах уонна дириҥ суолталаах көрүүлэрин олоххо киллэриигэ айымньылаахтык, тэтимнээхтик айа-тута сылдьарынан киэн туттабын уонна инники үлэтигэр ситиһиилэри, кытаанах доруобуйаны, тус олоҕор дьолу баҕарабын!