Улуус дьаһалтатын планеркатыгар ааспыт нэдиэлэҕэ улуус баһылыга Степан Саргыдаев нэһили...
Улуус дьаһалтатын планеркатыгар ааспыт нэдиэлэҕэ улуус баһылыга Степан Саргыдаев нэһилиэктэргэ үлэни-хамнаһы, кыстыкка киириини көрөр-истэр сырыыларыгар хаһаайыстыбалар кыстыкка үчүгэйдик оҥостон-туттан киирэн олороллорун, «Малая мощность” программата киириэҕиттэн улууска балайда саҥа хотоннор үлэҕэ киирбиттэрин, тыа хаһаайыстыбатын миниистирин солбуйааччы Сахаяна Павлова кэлэн эһиил күһүн үлэҕэ киириэхтээх Харыылаах гидротехническэй быһытын тутуу хаамыытын көрбүттэрин, Бырабыыталыстыба Бэрэссэдээтэлин солбуйааччы Георгий Степановка Хоту көһөрүллүү 85 сылын ыытыы тэрээһин боппуруостарыгар өрөспүүбүлүкэтээҕи тэрийэр хамыыһыйа мунньаҕар 41 пууннаах түөрт разделлах бырайыак бэлэмнэммитин, бу үбүлүөй тэрээһиннэрин арыйар Чурапчы быыстапка Дьокуускайга “Россия – моя история” музей дьиэтигэр куун тутарга туруохтааҕын, онно хотугу үс улуус кыттыахтаахтарын, кэлэр сылга туох баар үлэ-хамнас Хоту көһөрүллүү үбүлүөйдээх сылыгар туһуланан ыытыллыахтааҕын тоһоҕолоон бэлиэтээтэ. Саҥа нэдиэлэҕэ СӨ Бырабыыталыстыбатын Бэрэссэдээтэлэ Кирилл Бычков кыттыылаах «Кыталык” уһуйааны үөрүүлээхтик арыйыы, Госдуума депутаата Петр Шамаев региональнай нэдиэлэтин Чурапчы улууһуттан саҕалыыр сырыыта, Бастык Бэрэсидьиэн М.Е.Николаевка аналлаах тэрээһиннэр, Сомоҕолоһуу күнэ, Чурапчы улууһугар Х спортивнай оонньуулары ыытыыга куонкуруска кыттыыга хамыыһыйа мунньаҕа, спорт маастара, анал байыаннай дьайыы кыттыылааҕа В.В.Илларионов аатынан өрөспүүбүлүкэтээҕи аһаҕас турнир, онтон да атын спортивнай күрэхтэһиилэр, каадырдары иитэн таһаарыы кыахтарын сайыннарыыга туһуламмыт стратегическай былааны, муниципальнай былааннары сүбэ мунньахха көрүү уо.д.а. былааҥҥа киирдилэр. Полиция отделын сводкатынан, 50 сайабылыанньа киирбититтэн кирэдьиит ылан баран төлөөбөт буолууга - 21 үҥсүү, арыгы иһэн баран сылдьыыга - 7, 204 массыына бэрэбиэркэлэммититтэн 59 боротуокуол толоруллан үлэ бара турар. Уот барыытын-холбонуутун графигын тутуһууну хонтуруолга тутарга, кыстык кэмигэр ордук тыын суолталаах тэрилтэлэр салайааччылара улуус баһылыгын планеркатыгар сылдьаллара суолталааҕа бэлиэтэнэн боротокуолга киирэн, булгуччу сылдьалларыгар этилиннэ.