Бүгүн - Ытык киһибит Сахабыт сирин Бастакы Бэрэсидьиэнэ Михаил Ефимович Николаев бу орт... — 4 августа 2026 г. в 02:34:16.422
Бүгүн - Ытык киһибит Сахабыт сирин Бастакы Бэрэсидьиэнэ Михаил Ефимович Николаев бу орто дойдуттан барбыт сырдык сыдьаайдаах кэриэстэбил күнэ... Михаил Ефимович олохпут оҥкула төрдүттэн уларыйар, саҥалыы суолунан сайдар суолларын тобулунар-торумнуур тургутуулаах кэмнэригэр норуоту сөптөөх суолунан сирдээбит, дойдубут, өрөспүүбүлүкэбит судаарыстыбаннастарын, улуустарбыт, нэһилиэктэрбит чөл туруктаах сайдыыларын туруулаһар, харыстыыр туһугар туохха да тэҥнэспэт сүҥкэн хамсатыылаах, көдьүүстээх үлэни ыыппыт Россия уонна Саха Өрөспүүбүлүкэтин уһулуччулаах судаарыстыбаннай, уопсастыбаннай диэйэтэлэ, саха саарына, кэрэмэс киһитэ этэ. Кини өрөспүүбүлүкэбит Бэрэсидьиэнинэн төрөөбүт дойдутун, норуотун туһугар бэриниилээх үлэтэ, саха норуотун ытык дьонун улуу дьыалаларын утумнаахтык салҕаабыт, кэс тылларын история саҥа кэрдиис кэмигэр олоххо киллэрбит, норуотугар киэҥ суолу солообут, сайдыы аартыктарын арыйбыт үтүөтэ, өҥөтө тугунан да кэмнэммэт, сыаналаммат улахан. Михаил Ефимович биһиги Чурапчыбыт улууһугар кэккэ сыллар тухары өрүү сылдьан, үлэни, олоҕу-дьаһаҕы, улуус сайдыытын билсэ, көрө-истэ, ыйа-кэрдэ, сүбэлии сылдьыбыта, тыа хаһаайыстыбатыгар, бааһынай хамсааһыныгар өрөспүүбүлүкэ тумус туттар улууһун быһыытынан сайдыахтааҕар бүк эрэллээҕэ, ол да иһин күүскэ өйүүрэ, улуус саҕалааһыннарын биһириирэ, холобурга туруорара. "Модун санааны үөскэтиэххэ наада. Итэҕэл диэн бэйэҕэ итэҕэйии буолар, "Мин кыайыаҕым" диэн, "Мин күүстээхпин" диэн, "Мин дьоҕурдаахпын" диэн, "Мин сахабын" диэн! Ол буолар - күүстээх итэҕэл. Хас биирдии киһиэхэ итэҕэл бэйэтигэр баар. Ол трибунаттан көстөр дуу, плакатка суруллубут дуу буолбатах. Киһи өйүгэр баар, киһи күүһүгэр баар, киһи санаатыгар баар. Оннук ыччаттары биһиги иитиэх тустаахпыт", - диэн саха норуотун ньургун уола, үйэлэргэ киэҥ туттар улуу киһитэ Михаил Ефимович Николаев төрөөбүт норуотугар, бар дьонугар, үүнэр сүһүөх ыччатыгар туһаайан этиитэ, Чолбон сулус курдук, сырдыы, саҥаттан саҥа ситиһиилэргэ сирдии, үтүөҕэ, үрдүккэ, кэрэ кэскилгэ умсугута-угуйа туруоҕа! Киниэхэ, норуот чулуу уолугар, Саха сирин норуотун, бар дьонун махтала, таптала муҥура суох!