Улуус салалтатын, бар дьонун уонна тус бэйэм ааппыттан успуорт көрүҥнэригэр ыччаттарбыт...
Улуус салалтатын, бар дьонун уонна тус бэйэм ааппыттан успуорт көрүҥнэригэр ыччаттарбытын успуортка уһуйа, дьарыктыы, үрдүк чыпчалларга сирдии, таһаара сылдьар бары тириэньэрдэрбитин Арассыыйаҕа Тириэньэр күнүнэн ис сүрэхпиттэн эҕэрдэлиибин! Биһиги Чурапчыбыт улууһа киэҥ эйгэҕэ иһиллэр-биллэр спорт муҥутуурдук сайдар киинэ буолан, аан дойдуга чулууттан чулуу спортсменнарынан эрэ буолбакка, саха норуотун, бүтүн дойду, аан дойду таһымнаах улуу тириэньэрэ Дмитрий Петрович Коркинтан саҕалаан, Вячеслав Карпов, Семен Морфунов, Альберт Бродников, Иван Сивцев, Семен Макаров, Альберт Макаров, Константин Гаврильев, Эрчимэн Макаров курдук бииртэн биир чаҕылхай тириэньэрдэрбит ааттара аан дойду, Европа, Арассыыйа уонна өрөспүүбүлүкэ улахан түһүлгэлэригэр өрөгөй кыайыылары ситиспит үөрэнээччилэрин ааттарын сэргэ ааттанарынан киэҥ туттабыт, махтанабыт, уурбут сыраларын, маастарыстыбаларын үрдүктүк сыаналыыбыт! Тириэньэрдэр, эһиги, сатабыллаах, мындыр үлэҕит түмүгэр улууспут спортсменнара ситиһиилээхтик киирситэлээн, кыайыы өрөгөйүн дойдуга, норуокка күн бүгүҥҥэ диэри биллэрэн, үөрдэн-көтүтэн кэллилэр. Үөрэнээччилэргит хас биирдии кыайыылара эһиги үгүс сыраҕытынан, дьарыктааһыҥҥытынан, күүстээх санааны, тулхадыйбат дьулууру муударайдык иҥэриигитинэн ситиһиллэрин өйдүүбүт. Бэтэрээн тириэньэрдэрбит Сахабыт сирин, бүтүн Сойуус, Арассыыйа успуордун устуоруйатыгар чаҕылхай суолу-ииһи хаалларбыт үтүөлэргит умнуллубаттар. Эһиги бука барыгыт ситиспит ситиһиилэргит, дабайталаабыт үрдэллэргит үүнэр көлүөнэ тириэньэрдэри, спортсменнары кыайыылартан кыайыыларга ыҥырар сулус буолан, сырдыы, угуйа туруохтара! Бүгүҥҥү дьоро күҥҥүтүнэн итиитик, истиҥник эҕэрдэлээн туран, эһиэхэ ситиһиилээх үөрэнээччилэри, кытаанах доруобуйаны, тус олоххо этэҥҥэ буолууну, айымньылаах үлэни уонна кыайыыттан кыайыылары баҕарабын!