Улуус баһылыгын Степан Саргыдаев ыыппыт планеркатыгар Саха Өрөспүүбүлүкэтин Бастакы бэр... — 3 августа 2026 г. в 11:59:49.994
Улуус баһылыгын Степан Саргыдаев ыыппыт планеркатыгар Саха Өрөспүүбүлүкэтин Бастакы бэрэсидьиэнин Михаил Ефимович Николаевы ахтан-санаан ааһар күн кэлэн иһэринэн кини үлэтин, олоҕун, өрөспүүбүлүкэни салайбыт кэмин, Чурапчы улууһугар тыа хаһаайыстыбата сайдарыгар уурбут акылаатын туһунан ахтан-санаан аастылар. Салгыы улуус баһылыга сүрүн болҕомтону оттооһун уонна үүтү ыаһын былааннарын толоруу хаамыытыгар туһаайда. Билиҥҥитэ улууска 8 тыһыынча тонна курдук от бэлэмнэммит. Бу былырыыҥҥы көрдөрүүттэн үрдүк. Онон айылҕа туран биэрдэҕинэ, былааны толорон, кыстыыр оту хаһааныахха сөп диэн этилиннэ. Билигин оттооһун хаамыыта күүскэ бара турар. Улуус дьаһалтатын үлэһиттэрэ былырыыҥҥыттан аҕыйах киһилээх чааһынай хаһаайыстыбаларга оттооһуҥҥа көмөлөһөр үгэһин быйыл салгыыр. Үүтү туттарыыга улуус кооперативтара уопсай былааннарын 110-112 бырыһыанынан куоһаран иһэллэрэ бэлиэтэннэ. Үүтү туттарыыга улуус 5200 тонна былааннаах. Этэҥҥэ буоллаҕына, бу былааны улуус 100-200 тоннанан аһарар, үүккэ эбии төлөбүрү ылар соругу ылынан үлэни ыытар. Баһылык Степан Саргыдаев кыстыкка бэлэмнэнии боппуруостарын күүстээх хонтуруолга тутарга эттэ. Ол курдук хочуолунайдары, ситимнэри өрөмүөннээһин, промывканы кэмигэр ыытыы уо.д.а. үлэлэрин, свалка боппуруостарын сүрүннээһини уонна хонтуруоллааһыны күүһүрдэргэ бары баһылыктарга, тустаах салайааччыларга сорудахтары биэрдэ. Бүгүн Мырылаҕа ситимнэри сууйар, ыраастыыр үлэ барыа. Улуус баһылыга Степан Саргыдаев Дьааҥы улууһугар ууга барбыт нэһилиэктэргэ көмөнү оҥорууга уопсай быһыыны-майгыны билиһиннэрэн туран, улуус баһылыга нэһилиэктэр, олохтоохтор, тэрилтэлэр көмөнү хомуйууга салгыы кытталларыгар ыҥырда, бастакынан көмөлөрүн түргэнник киллэрбит нэһилиэк баһылыктарыгар, тэрилтэ салайааччыларыгар махтанна. Хомуллубут көмө өрөспүүбүлүкэ туһааннаах штабыгар туттарыллар, киирбит үп-харчы Дьааҥы улууһугар көмө пуондатыгар ыытыллар. Планеркаҕа баһылык улуустааҕы территориальнай быыбар хамыыһыйата үлэтин саҕалаабытын, пропискалаах дьон аны күһүҥҥү Госдуума быыбарыгар дойду ханнык баҕарар муннугуттан куоластыыр кыахтаахтарын иһитиннэрдэ. Ааспыт нэдиэлэҕэ Степан Саргыдаев кыстыкка киириигэ бэлэмнэнии чэрчитинэн бырабыыталыстаба бэрэссэдээтэлигэр Кирилл Бычковка киирэн, олох-дьаһах, хомунаалынай хаһаайыстыба кыстыкка бэлэмнэниитин хаамыытын иһитиннэрбитин, бу хайысхаҕа эбии харчыны көрдөөһүҥҥэ, үбүлээһиҥҥэ өйөбүлү ылыыны туруорсар кэпсэтиилэр барбыттарын туһунан эттэ. Салгыы улуус баһылыга бырабыыталыстаба бэрэссэдээтэлин бастакы солбуйааччы эбээһинэһин толорооччу Николай Бочковка Чурапчыга Октябрьскай уулусса бастакы кварталыгар уонна Д.П.Коркин аатынан уулуссаҕа уунан хааччыллыыга, септиккэ тахсыбыт ороскуоттары толуйууга анал дьаһалы таһаарыыга улахан өйөбүлү ылар ситиһиллибитин кэпсээтэ. Граннарга кыттыыга сайаапкалары ылыы салҕанан бара турарынан Степан Саргыдаев баһылыктарга, салайааччыларга туһаайан бэйэ бырайыактарын олоххо киллэриигэ грант үбүн тардыыга үлэни күүһүрдэргэ эттэ. Федеральнай граҥҥа кыттыы түмүгүнэн «Туллукчаан” уһуйаан кыайан, бэйэтин бырайыагар 982 тыһыынча солкуобайдаах граны ылар буолбут, планеркаҕа бу уһуйаан граннарга күүскэ үлэлиирэ бэлиэтэннэ. Үүммүт нэдиэлэҕэ олох-дьаһах, хомунаалынай хаһаайыстыбаны кыстыкка бэлэмнээһиҥҥэ, ону сэргэ тыа хаһаайыстыбатыгар оперативнай ыстааптар мунньахтара, транспортнай инфраструктураны сайыннарыыга улуус стратегическай бырайыагын көрүүгэ, хомунаалынай өҥөлөр иһин төлөбүрү кииннээһиҥҥэ, улуус дохуот киллэрэр кыаҕын улаатыннарыыга, онтон да атын тирээн турар суолталаах боппуруостарга мунньахтар, субсидия ылбыт урбаанньыттар үбү туһаныыларын нэһилиэктэринэн бэрэбиэркэлиир сырыылар, чэппиэргэ Д.П. Коркин аатынан Албан аат музейыгар саха үс чаҕылхай тустууга 1976 с. Монреальга ыытыллыбыт Олимпиадаҕа хатыламмат өрөгөйдөөх кыайыыларын 50 сылыгар аналлаах тойон сэргэни үөрүүлээх быһыыга-майгыга туруоруу тэрээһинэ, булчуттарга квотаны үллэрии уо.д.а. хайысхатынан үлэлэр былааҥҥа киирдилэр.