Күндү биир дойдулаахтарбын номоххо киирбит тоҕус томтордоох, хатыҥнардаах, чараҥнардаах... — 11 сентября 2026 г. в 23:46:30.116
Күндү биир дойдулаахтарбын номоххо киирбит тоҕус томтордоох, хатыҥнардаах, чараҥнардаах, тапталлаах Чурапчыбыт нэһилиэгин кэрэ-бэлиэ төрөөбүт күнүнэн улуус салалтатын уонна тус бэйэм ааппыттан итиитик, истиҥник эҕэрдэлиибин! Биһиги нэһилиэкпит Ньамньах кинээс 1648 сыллаахха ыраахтааҕыттан алтан бэчээти тутуоҕуттан ыла нэһилиэк аатын сүгэн, үүнэн-сайдан кэлбит устуоруйатын устатыгар Чурапчыбытын салайан сайыннарбыт чулуу салайааччыларбыт, тоҥтон толлубат үлэһит ньургун дьоммут үтүө кылааттарын умнубаппыт, өйдүүбүт, сүгүрүйэбит. Чурапчыттан ситэн-хотон тахсыбыт саха норуотугар ытыктанар, биллэр-көстөр дьоммутунан өрүү киэн туттабыт. Кинилэр холобурдарыгар үүнэр сүһүөх ыччаппыт иитиллэн, үүнэн-сайдан иһэриттэн үөрэбит, астынабыт. Дьуон Дьаҥылы этэн кэбиспитинии, биһиги бары даҕаны «Күөх кырсыгар күөлэһитэн, кырабыттан үлэлэтэн, мөҕөн-таптаан миигин бачча киһи гыммыт баар – Чурапчы!”, - диибит! Чурапчыбыт нэһилиэгэ сыллата тупсар, киэркэйэр. Өрөспүүбүлүкэ, улуус, нэһилиэк салалталара тахсыылаахтык бииргэ үлэлээһиннэрин түмүгэр Чурапчыга диэри аспаал суол, саҥа социальнай суолталаах аныгы тутуулар, дьону эргэ дьиэлэртэн саҥаҕа көһөрүү, бөһүөлэги гаастааһын, уулуссалары аспааллааһын, сквердэри тупсарыы курдук дьоһун үлэлэр, сонун бырайыактар олоххо киирэ тураллар. Улууспут киинин сайдыытыгар ыытыллар бары үлэлэргэ, субуотунньуктарга эһиги, олохтоохтор, күүстээх өйөбүлгүт, бары биир киһи курдук үөрэн-көтөн, өрө көтөҕүллэн, көхтөөхтүк кыттыыгыт иһин барҕа махталбын этэбин. Инникитин даҕаны “Чурапчы күүһэ - сомоҕолоһууга!” диэн үтүө хамсааһыммыт барыбытын түмэ, сомоҕолуу турдун! Чурапчыбыт нэһилиэгин төрөөбүт күнүнэн барыгытыгар ситиһиилээх үлэни, кытаанах доруобуйаны, төрөөбүт дойдуга уҕараабат итии тапталы баҕарабын! Тапталлаах Чурапчыбыт үйэлэргэ үүнэ-сайда, чэчирии-чэлгийэ турдун!