Чурапчы улууһугар олох-дьаһах хомунаалынай сулууспа тэрилтэлэрин үлэһиттэрэ, улуус уоту...
Чурапчы улууһугар олох-дьаһах хомунаалынай сулууспа тэрилтэлэрин үлэһиттэрэ, улуус уотун ситимин электриктэрэ өрөспүүбүлүкэ үрдүнэн гражданскай оборуона хайысхатынан ыытыллыбыт Бүтүн Арассыыйатааҕы икки күннээх үөрэххэ кытыннылар. Учениены ыытыы Ыксаллаах быһыыны-майгыны сэрэтиигэ уонна туоратыыга биир кэлим судаарыстыбаннай систиэмэ Саха сиринээҕи подсистематын Чурапчытааҕы звенотун салалтатыгар уонна бары үлэһиттэригэр туһаайыллыбыт улуус үрдүнэн үрдүк бэлэмнээх буолуу эрэсиимин биллэрииттэн саҕаланна. Онуоха учение сүрүн соругунан "Саха сирэ барыта аракыатанан маассабай атаака түмүгэр уота уонна ититиитэ суох хаалбытыгар ханнык хамсаныылары оҥоробут" диэн үөрэтии буолла. Электриктэр маннык түбэлтэҕэ тута холбоно охсор саппаас РИП-тэрин (Резервированный источник питания), оттон ОДьКХ үлэһиттэрэ саппаас хочуолларын холбоотулар. Онон учение кэмигэр нэһилиэнньэҕэ "уоту уонна сылааһы биэриини тута хааччыйыы" ситиһилиннэ. Учение иккис хайысхатын соругунан "Чурапчы улууһугар Иркутскай уобалаһыттан уон тыһыынча куотуу дьон кэлбитин дьиэнэн-уотунан, бастакы уочараттаах көмөнөн хааччыйыы" диэн үөрэх ыытылынна. Ол курдук, улуус 16 нэһилиэктэринэн быстах кэмҥэ олордор сирдэринэн кулуупка, спорт саалатыгар "350-нуу киһини батарыы, ордубут 4 тыһыынча киһини улуус киинигэр эмиэ оннук олохтооһун" соруга толорулунна. Бу үөрэх кэмигэр нэһилиэктэр баһылыктара кэлбит дьоҥҥо наадалаах малы-салы, гуманитарнай көмөнү хомуйдулар. Бээтинсэҕэ ыытыллыбыт ыксаллаах быһыыга-майгыга туттуллар күүһү-кыаҕы көрүүгэ барыта 60 киһи уонна 20 техника кытынна. Чурапчы улууһа бу ыытыллыбыт гражданскай учениеларга туруоруллубут соруктары толордо.