Улуус баһылыгын бастакы солбуйааччы Рустам Данилов улуус дьаһалтатын планеркатыгар аас...
Улуус баһылыгын бастакы солбуйааччы Рустам Данилов улуус дьаһалтатын планеркатыгар ааспыт нэдиэлэҕэ ыытыллыбыт үлэлэр түмүктэрин таһааран, үүммүт нэдиэлэ саҥа былааннарын чопчулаата. Планеркаҕа кини ааспыт нэдиэлэ устатыгар ыытыллыбыт сүрүн үлэлэри бэлиэтээтэ, нэһилиэктэр, тэрилтэлэр сылааһынан хааччыллыыга толору бэлэмнэрин туһунан пааспардары ылыыга кинилэр хомунаалынай төлөбүрдэргэ ханнык да иэһэ суох буолуохтаахтарын санатта, билиҥҥи кэмҥэ чараас мууска оҕо аймах уонна нэһилиэнньэ сэрэхтээх буолуутугар сэрэтэр үлэни күүскэ ыытыыга баһылыктарга уонна тэрилтэ салайааччыларыгар сорудахтаата. Маны сэргэ Чурапчы иһинээҕи автобус сырыытын боппуруоһугар нэһилиэк бас билиититтэн улууска көһүүтүн дьыалата быһаарылынна да, аныгыс нэдиэлэҕэ автобус сүүрүөн сөп диэн этилиннэ. Полиция отделын иһитиннэриитинэн, дьиэҕэ-уокка уонна уопсастыбаннай миэстэлэргэ арыгылааһыны, араас буруйу оҥоруулары таһынан арыгыны атыылааһын түбэлтэтэ итиэннэ икки киһи ууга түһэн өлүүтэ бэлиэтэммитинэн силиэстийэлиир үлэлэр бараллар. Саҥа нэдиэлэ былааныгар Арассыыйаҕа Аҕа күнүн, өрөспүүбүлүкэҕэ Ийэ күнүн чэрчитинэн декадалар, бу бырааһынньык күннэр араас өрүттээх тэрээһиннэрэ, сылааска холбонууга толору бэлэм туһунан пааспардары туттарыыны салгыы ыытыы, өрөспүүбүлүкэ Олохтоох салайыныытын Сэбиэтин мунньаҕын үлэтигэр баһылыктар кыттыылара, "Алааһым оһуордаах оһуохайа" улуустааҕы семинар-практикум, улуус тирээн турар суолталаах боппуруостарынан сүбэ мунньахтар уо.д.а. киирдилэр. Планеркаҕа иһитиннэриинэн, Аҕам саастаахтар күннэрин декадата үрдүк тэрээһиннээхтик ыытыллан түмүктэммит. Арассыыйаҕа Аҕа күнүн, өрөспүүбүлүкэҕэ Ийэ күнүн итиэннэ Хат ийэлэр күннэрин көрсө ыытыллар декадалар бырагыраамаларыгар нэһилиэктэргэ, оскуолаларга, уһуйааннарга, үлэ тэрилтэлэрин кэлэктииптэригэр аҕалары, ийэлэри чиэстээһиннэри, доруобуйаларынан хааччахтаах дьонноох дьиэ кэргэннэргэ араас күрэхтэһиилэри, тулаайах оҕолору иитэр дьиэ кэргэннэргэ аналлаах тэрээһиннэри сэргэ аҕа уонна уол, ийэ уонна кыыс кыттыылаах күрэхтэһиилэр, көрүүлэр, анал байыаннай дьайыы кыттыылаахтарын ийэлэригэр маастар-кылаас уо.д.а. тэриллэн ыытыллаллара бэлиэтэннэ.