Улуус дьаһалтатын планеркатыгар ааспыт нэдиэлэҕэ ыытыллыбыт үлэлэр түмүктэрин таһаардыл...
Улуус дьаһалтатын планеркатыгар ааспыт нэдиэлэҕэ ыытыллыбыт үлэлэр түмүктэрин таһаардылар, үүммүт нэдиэлэ саҥа былааннарын ылыннылар. Ааспыт нэдиэлэҕэ улуустааҕы “Саҥа олох” хаһыат тэриллибитэ 95 сылын бэлиэтээһин, СӨ Олохтоох бэйэни салайыныы Сүбэтин мунньаҕар Госдуума быыбарын түмүктэрин, улуустарга кыстыгы бары өттүнэн этэҥҥэ туорааһын, тыа хаһаайыстыбатын, сүөһүнү кыстатыы, таһаҕаһы кэмигэр тиэрдии тирээн турар боппуруостарынан кэпсэтии кэннэ былааннары, дьаһаллары ылыныы, бу боппуруостарга үөскүүр кыһалҕалары өрөспүүбүлүкэ былааһын кытта бииргэ быһаарыы, улуустар граннарга кыттыылара дьүүллэһиллибит. Чурапчы уонна Таатта улуустарын уунан хааччыйыыга улахан суолталаах уонна болҕомтону эрэйэр Харыылаах быһытыгар уонна Чурапчыга Мурун Тыымпыйа түөлбэҕэ "Кыталык" уһуйааҥҥа хапытаалынай өрөмүөн ыытыллыбыт үлэлэрэ көрүллүбүттэр. Маны сэргэ улууска "Арассыыйа Ийэлэрэ" Бүтүн Арассыыйатааҕы общественнай хамсааһын Саха сиринээҕи салаатын бэрэссэдээтэлэ Прасковья Петровна Борисова Россияҕа Аҕа уонна Саха Өрөспүүбүлүкэтигэр Ийэ күннэринэн итиэннэ "Ыал саргыта" пилотнай бырайыак чэрчитинэн "Киэҥ туттабын аҕабынан, ийэбинэн" диэн дьоһун тэрээһининэн хамсааһын аатыттан улуус бары төрөппүттэрин эҕэрдэлээн туран, наҕараадалары туттарбыт. Салгыы аҕыс оҕону соҕотоҕун атаҕар туруорбут улуус киэн туттар биир дьоһун ийэтин, өр сылларга кыра саастаах оҕолору иитиигэ-харайыыга үгүс сыратын биэрбит тарбахха баттанар туруу үлэһит уонна улуус киэн туттар ытык киһитэ, сенатор Е.А.Борисов төрөппүт ийэтин П.И.Борисова аатынан бириэмийэни Болтоҥо нэһилиэгиттэн 10 оҕолоох Мария уонна Авсентий Григорьевтар, Хоптоҕоттон 7 оҕолоох Айталина Андреева уонна Ренат Толстоухов дьиэ кэргэннэригэр туттарбыт. С.К. Макаров аатынан Чурапчы гимназиятын аактабай саалатыгар «Учуутал, Эн үрдүк аакка сүгүрүйэн...» диэн Чурапчы улууһа, өрөспүүбүлүкэ тумус туттар Россия үтүөлээх учуутала, физика, информатика үрдүк категориялаах учуутала, Учууталлар учууталлара, Саха Өрөспүүбүлүкэтин Норуотун учуутала Мария Иустиновна Хоютанованы уонна аангылыйа тылын учуутала, “Саха сирин методиһа” бэлиэ хаһаайката, “Сыл бастыҥ учуутала” өрөспүүбүлүкэтээҕи күрэх муҥутуур кыайыылааҕа, Бүтүн Арассыыйатааҕы күрэх кыттааччыта Юлия Мироновна Макарованы чиэстиир тэрээһиҥҥэ улуус салалтата, үөрэхтээһин салаатын салайааччылара, ыҥырыылаах ыалдьыттар, учууталлар, үөрэнээччилэр, төрөппүттэр кыттыбыттар. Планеркаҕа улуус баһылыгын бастакы солбуйааччы Рустам Данилов уоппускаҕа барбытын туһунан иһитиннэрдилэр. Саҥа нэдиэлэ былааныгар улуус баһылыга Степан Саргыдаев уонна улуус баһылыгын тыа хаһаайыстыбатын боппуруостарыгар солбуйааччыта Анжелика Неустроева Амма улууһугар Илин эҥэр улуустарга агропромышленнай комплекс тирээн турар боппуруостарыгар Ил Дархан салайан ыытар улахан мунньаҕар кыттыылара, кинилэр салайааччылаах бөлөх Одьулууҥҥа уонна Болугурга оробуочай сырыыта, улуус баһылыгар Ил Дархан стратегическай суолталаах ыйаахтарын олоххо киллэрии хаамыытын көрөр мунньах, улуус депутааттарын сессията, чэппиэргэ улуус салалтата “Чурапчы” ТХПК кэлэктиибин кытта көрсүһүүтэ, каадырынан хааччыллыы стратегическай суолталаах боппуруоһугар улуус баһылыгар сүбэ мунньах, “Белая трость” декада, ЧГИФКиС баазатыгар күһүҥҥү кросс, драматическай кэлэктииптэр куокурустара, Чурапчытааҕы гимназия онус кылааһын үөрэнээччитэ Артем Собакин анал байыаннай дьайыы кыттыылааҕын туһунан иллюстрациялаах брошюратын билиһиннэрии, Амма орто оскуолатыгар научнай-практическай кэмпириэнсийэ, Чурапчытааҕы Норуот тыйаатырын сезонун арыллыыта, Степан Саргыдаев Оҕо бибилэтиэкэтигэр сылдьыыта, А.И. Федотов аатынан спорткомплекска Чурапчы нэһилиэгэ ППМИ программатыгар граннарга киирсэригэр бырайыактары талыы уопсай мунньаҕа, ЧГИФКиС уонна Чурапчытааҕы агротехническэй колледж бастакы куурус устудьуоннарын үөрэххэ, билиигэ, идэҕэ кынаттыыр сүрэхтээһин уо.д.а. былааннаннылар.