Улууска тыа хаһаайыстыбатын кыра кыамталаах объектара тутуллуохтара — 18 июня 2026 г. в 02:01:13.634
Улууска тыа хаһаайыстыбатын кыра кыамталаах объектара тутуллуохтара Нам улууһугар тыа хаһаайыстыбатын кыра кыамталаах объектарын тутууга уонна модернизациялааһыҥҥа (саҥардан тупсарыыга) субсидия биэрэр сыаллаах куонкурус түмүктэннэ. Бу тэрээһин тыа хаһаайыстыбатын бородууксуйатын оҥорон таһаарааччылары өйүүр сыаллаах Российскай Федерация уонна Саха Өрөспүүбүлүкэтин тыатын хаһаайыстыбатын министиэристибэлэрин, "Нам улууһа" МО дьаһалтатын программаларын чэрчилэринэн ыытылынна. Куонкуруһу улуустааҕы тыа хаһаайыстыбатын управлениета тэрийэн ыытта. Уопсайа улуус үрдүнэн куонкуруска 6 хаһаайыстыбаттан сайаапка киирбит. Улуустааҕы тыа хаһаайыстыбатын управлениетын кылаабынай экономиһа Алексей Корякин: — Улуустааҕы хамыыһыйа быһаарыытынан, куонкуруска кыттыбыт хаһаайыстыбалар бары туруоруллубут ирдэбиллэри толорон, ааһан, көмө ылар кыахтаннылар. Бу көрүллүбүт үп-харчы улууска тыа хаһаайыстыбатын салаатын сайыннарыыга уонна нэһилиэнньэни олохтоох аһынан-үөлүнэн хааччыйыыга тирэх буолуоҕа. Куонкурус кыайыылаахтарынан уонна тустаах көмөнү ылааччыларынан улууска үлэлии-хамныы сылдьар хаһаайыстыбалар уонна урбаанньыттар буоллулар: ✔️Яковлев Трофим Дмитриевич (Үөдэй нэһилиэгэ) — 70 төбө сүөһү турар хотонун тутууга; ✔️Константинов Эдгар Валентинович (Үөдэй нэһилиэгэ) — хортуоппуй уонна оҕуруот аһын харайар анал объекты тутууга; ✔️Слепцов Александр Петрович (Бөтүҥ нэһилиэгэ) — 70 төбө сүөһү турар хотонун тутууга; ✔️«Эрэл» тыа хаһаайыстыбатын потребительскай кооператива — үүт бородууксуйатын оҥорон таһаарар анал оборудование атыылаһыыга; ✔️Кривошапкин Сергей Георгиевич (Хамаҕатта нэһилиэгэ) — кыһыҥҥы теплица тутуутугар; ✔️Дьяконов Данил Васильевич (Искра нэһилиэгэ) — сылгы иитэр базаны тутууга. Куонкурус протоколун сиһилии түмүгэ Нам улууһун тыатын хаһаайыстыбатын управлениетын официальнай саайтыгар тахсыбыта. Тустаах үбүлээһин 2026 сыл бэс ыйыгар - от ыйыгар хаһаайыстыбаларга толору бэриллиэҕэ уонна былааннаммыт үлэлэри уһаппакка кэмигэр олоххо киллэрэргэ туһуланыаҕа, тустаах хонтуруолга туруоҕа. Субсидия (көмө харчы) уопсай сууммата – 29 750 000 солкуобайга тэҥнэһэр - диэн иһитиннэрдэ. «Нам улууһа» МО пресс-сулууспата