Оттук сезонугар бэлэмнэнии боппуруоһа хонтуруолга турар — 16 июня 2026 г. в 09:56:35
Оттук сезонугар бэлэмнэнии боппуруоһа хонтуруолга турар Бэҕэһээ, бэс ыйын 15 күнүгэр, улуус баһылыга Юрий Слепцов 2026–2027 сыллааҕы оттук сезонугар бэлэмнэнии боппуруостарыгар мунньаҕы салайан ыытта. Мунньахха социальнай эбийиэктэри сылааһынан хааччыйар сүрүн тэрилтэ — «Намкоммунтеплоэнерго» АО производственнай-техническэй отделын начальнига Николай Саввинов уонна нэһилиэктэр баһылыктара кэлэр кыстыкка бэлэмнэнии үлэлэр туһунан иһитиннэрии оҥордулар, ону тэҥэ сүрүн харгыстары, кыһалҕалары эттилэр, санааларын атастастылар. Сыл аайы улуус тэрилтэлэрэ кыстыкка бэлэм буолууларын туһунан докумуоннары хонтуруоллуур Ростехнадзор Ленскэйдээҕи управлениетыгар ыыталлар. Бу бэрэбиэркэ түмүгүнэн тэрилтэлэргэ кыстыкка бэлэм буолуу паспордара бэриллэр. Бэлэм буолуу паспорын ылар туһугар хас биирдии элбэх квартиралаах олорор дьиэҕэ уонна социальнай объектарга оттук сезонугар комплекснай былааннаах үлэлэр ыытыллаллар. Ол курдук, ититии ситимнэрин өрөмүөнэ, турбалары сайҕатыы (промывка) уонна гидравлическай тургутуу (опрессовка) үлэлэр оҥоһуллаллар. Ону тэҥэ бары техническэй докумуоннар ирдэбилгэ сөп түбэһиннэрэн сааһыланаллар. Ханнык эмэ итэҕэһи туоратыы туһунан предписание эбэтэр этии баар буоллаҕына, ону барытын кэмигэр уонна хаачыстыбалаахтык көннөрүү ирдэнэр. Ростехнадзор бары ирдэбиллэр тутуһуллубуттарын хонтуруоллаан, туох да итэҕэс суоҕун бигэргэттэҕинэ - кыстыкка толору бэлэм буолуу туһунан паспорт (паспорт готовности) бигэргэтэн биэрэр. Улуус баһылыга Юрий Иннокентьевич быйыл тэрилтэлэр кыстыкка бэлэм буолуу паспордарын атырдьах ыйын 1 күнүгэр диэри ылалларын ситиһэр сыалы-соругу туруорда. Мунньахха бэлиэтэммитинэн, улууска биир сүрүн кыһалҕанан ититии ситимнэрин сайҕатыы үлэлэрин (промывка) анал таһымнаахтык ыытар тэрилтэ суоҕа буолар. Бу боппуруоһу сорудах быһыытынан туруоран, кылгас кэм иһигэр быһаарарга үлэ ыытыллара булгуччулаах диэн сыал-сорук туруорулунна. «Нам улууһа” МО пресс-сулууспата