Нам улууһугар оҕо спордун көҕүлүүр сыаллаах үөрэх тэрилтэлэрин материальнай баазаларын ...
Нам улууһугар оҕо спордун көҕүлүүр сыаллаах үөрэх тэрилтэлэрин материальнай баазаларын тупсарыыга ситимнээх үлэ барар. Онуоха бадминтон курдук саҥа сайдан эрэр спорт көрүҥүн сайыннарыыга Хамаҕаттатааҕы «Олимпик» спорт оскуолата “Территория равных: «Бадминтонный вызов первых» куонкуруска кыайбыт грана күүс-көмө буолар. Бу күннэргэ спорт оскуолатын директора Изабелла Сергеевна Массаеваны көрсөн бырайыак олоххо киириитин билиһиннэрэригэр көрдөстүбүт. ИЗАБЕЛЛА СЕРГЕЕВНА МАССАЕВА: “Эрдэ этиллибитин курдук, “Территория равных: «Бадминтонный вызов первых» гран куонкуруһугар кыайаммыт, 1 мөл. 220 тыһ. солк. суумалаах үбүнэн көмөнү ыламмыт оскуолаларга бадминтону сайыннарыыга үлэлэһэн эрэбит. Ол курдук бырайыакпыт улуус 7 оскуолатын — Нам 1, 2, 3 №-дээх, Хатыҥ Арыы, Хамаҕатта орто оскуолаларын, Хамаҕатта саха-француз лиссиэйин, улуустааҕы гимназияны — хабан олоххо киирэр. Бу оскуолалары стойкалаах сеткаларынан, бадминтон ракеткаларынан, воланнарынан, сорохторун спортивнай таҥастарынан хааччыйдыбыт. Кинилэр биһиги ыытар тэрээһиннэрбитигэр, күрэхтэрбитигэр кыттыахтаахтар. Бырайыак чэрчитинэн бадминтоҥҥа улуус сүрүн тренеринэн анаммыт Нам 2 №-дээх оскуолатын физическэй культура учуутала Александр Егорович Колосов 7 оскуолаҕа маастар-кылаастары ыытта. Манна оонньуу техникатын көрдөрдө, быраабылаларын кэпсээтэ, албастарга үөрэттэ. Алтынньы 7 күнүгэр “Мама, папа и я – веселая ракетка” дьиэ кэргэнинэн бадминтоҥҥа күрэх тэрийдибит. Сэтинньигэ түмүктүүр улуустааҕы тэрээһиммитин былаанныыбыт. Бу күрэххэ бырайыагынан хабыллыбыт 7 оскуола оҕолоро бастыҥы быһаарсыахтара”. Бадминтону, Саха сиригэр улаханнык тэнийэ илик спорт көрүҥүн, улууска сайыннарыы сонун, ураты хамсааһын буолар. Бадминтон Азия дойдуларыгар ордук киэҥник тарҕаммыт көрүҥ. Уруулуу омуктарбыт сөбүлээн оонньуур бадминтоннарын Нам улууһун оҕолоро баһылыылларыгар Хамаҕаттатааҕы «Олимпик» спорт оскуолатын кытта Александр Егорович уонна Сардана Петровна Колосовтар курдук энтузиаст учууталлар бииргэ үлэлээһиннэрэ ситиһиилээх, тахсыылаах буоллун! Улууспут спордун инники кэскилэ, оҕолорбут, эт-хаан өттүнэн сайынныннар, бадминтоҥҥа үрдүк чыпчааллары дабайдыннар, аан дойдуга тиийэ аатырдыннар-сураҕырдыннар! “Нам улууһа” МО пресс-сулууспата