Бүгүн, от ыйын 1 күнүгэр, Кыһыл Дэриэбинэ «Хатыҥ-Чараҥ» пааркатыгар өрөспүүбүлүкэтээҕи ... — 1 июля 2026 г. в 12:02:27.979
Бүгүн, от ыйын 1 күнүгэр, Кыһыл Дэриэбинэ «Хатыҥ-Чараҥ» пааркатыгар өрөспүүбүлүкэтээҕи доруобуйаларынан хааччахтаах дьон култуура уонна спорт бэстибээлэ ситиһиилээхтик, өрө көтөҕүллүүлээхтик түмүктэннэ. Тэрээһиҥҥэ Намтан, Алдантан, Тааттаттан, Мэҥэ-Хаҥаластан, Горнайтан, Хаҥаластан, Уус-Алдантан, Амматтан, Чурапчыттан уонна Дьокуускай куораттан 13 хамаанда, уопсайа 220-тэн тахса киһи көхтөөх кыттыыны ылла. Икки күн устата кыттааччылар спортивнай күрэхтэргэ - хабылыкка, хаамыскаҕа, быа эрийиитигэр, корнхоллга, классическай дартска уонна көрбөт уонна мөлтөхтүк көрөр дьон анал лазернай дартс көрүҥэр, городки күрэхтэригэр бастыҥы быһаарыстылар, ону сэргэ айар талааннарын вокалга уонна үҥкүүгэ көрдөрдүлэр. Тэрээһин үөрүүлээх сабыллыытыгар Нам улууһун баһылыгын социальнай боппуруоска солбуйааччыта Юрий Дьяконов уонна Бүтүн Россиятааҕы инбэлииттэр обществоларын Саха Сиринээҕи салаатын бэрэссэдээтэлин солбуйааччы эҕэрдэ тылларын тиэртилэр. Бэстибээл Саха сирин уһулуччулаах государственнай уонна политическай деятелэ И. Е. Винокуров сырдык аатын үйэтитиигэ биир бэлиэ тэрээһин буолла. Нам улууһун баһылыгын солбуйааччы Юрий Дьяконов, улуус дьаһалтатын дьиэ кэргэн уонна ыччат отделын үлэһиттэрэ, улуустааҕы доруобуйаларынан хааччахтаах дьон уопсастыбаннай тэрилтэтин бэрэссэдээтэлэ Марина Литвинова уонна улуус адаптивнай спортка специалиһа Людмила Собакина, уопсастыба нэһилиэктэрдээҕи салаалара үс күннээх тэрээһиҥҥэ сүүрэн-көтөн, кэлбит хамаандаларга сөптөөх усулуобуйа тэрийэн, бэстибээл үрдүк таһымҥа ыытылынна. Күрэхтэһии сүрүн судьуйатынан улуустааҕы физическэй култуура уонна спорт управлениетын специалиһа Евгений Сивцев ситиһиилээхтик үлэлээтэ. Хамаандалар ыраахтан-чугастан тэринэн кэлэннэр, итиини, куйааһы, ыраах айан сылаатын аахсыбакка икки күн тыҥааһыннаахтык күрэхтэһэн, атастыын-доҕордуун ахтыспыт санааларын үллэстэн, дуоһуйан астынан бардылар. Ким үчүгэй дьарыктаах, ол кыайыы кынаттанна. Уопсай түмүккэ бары кыттыбыт хамаандалары кыайыылааҕынан тахсыбыттарын туһунан иһитиннэрдилэр. Хамаандалар ЯРО ВОИ туруорбут сыаналаах бириистэринэн, РЦАФКиС туоһу суруктарынан, мэтээллэринэн наҕараадаланнылар. Хамаандалар салайааччыларыгар, улуустар доруобуйаларынан хааччахтаах дьон уопсастыбаннай тэрилтэлэрин бэрэссэдээтэллэригэр, судьуйаларга, тэрийээччилэргэ өйдөбүнньүк бириистэр, махтал суруктар туттарылыннылар. Бэстибээл Вера Цыпандина-Куличкина таһаарыытыгар оһуохайынан түмүктэннэ. Тэрийээччилэр бары күүс-көмө буолбут дьоҥҥо – ыалдьыттары көрсүһүүнү, олохсутууну тэрийсибит улуус нэһилиэктэрин дьаһалталарыгар, спонсордарга барҕа махталларын тиэрдэллэр. Бэстибээл кыттыылаахтарыгар кэлэр сылга өссө үчүгэйдик дьарыктанан, доруобуйаларын бөҕөргөтүнэн үрдүк чыпчааллары дабайа туралларыгар баҕарабыт. Хаһан да кыайыыга дьулуургут, күүстээх санааҕыт саппаҕырбатын. “Нам улууһа” МО пресс-сулууспата