Төрөппүттэр, оҕолоргутун көрүүтэ-истиитэ суох хаалларымаҥ! — 16 июля 2026 г. в 08:52:31.018
Төрөппүттэр, оҕолоргутун көрүүтэ-истиитэ суох хаалларымаҥ! Бүгүн, от ыйын 16 күнүгэр, сокуоннай саастарын туола илик оҕолор дьыалаларыгар уонна кинилэр бырааптарын көмүскүүр хамыыһыйа мунньаҕа буолла. Мунньаҕы хамыыһыйа бэрэссэдээтэлэ, улуус баһылыгын солбуйааччы Егор Протопопов салайан ыытта. Мунньах былаанынан бэрээдэги кэспит сокуоннай сааһын ситэ илик оҕолор дьыалаларын көрдүлэр. Ол түмүгүнэн, төрөппүттэр иитиигэ уонна көрүүгэ-истиигэ эбээһинэстэрин толорууларыгар хонтуруол күүһүрдүлүннэ. Кинилэргэ оҕону көрөр-истэр сокуоннай эбээһинэстэрин тутуһар туһунан сэрэтиилэр бэрилиннилэр. Ону таһынан сайыҥҥы кэмҥэ ууга, уокка сэрэхтээх буолууга, суол быраабылатын тутуһууга уонна оҕо эчэйиитин таһаарбат буолууга ураты болҕомтону уурдулар. Учуоттан уһуллубут оҕолорго анаммыт наставниктар эбээһинэстэрин тохтоттулар уонна наставниктар хамыыһыйаларын тэрийэргэ быһаардылар. Убаастабыллаах төрөппүттэр уонна сокуоннай бэрэстэбиитэллэр! Сокуоннай саастарын туола илик оҕолор дьыалаларыгар уонна кинилэр бырааптарын көмүскүүр хамыыһыйа сэрэтэр уонна ыҥырар: - Нам улууһун үрдүнэн аналлаах, көҥүллэммит сөтүөлүүр сир (пляж) суох! Онон оҕолор ууга сөтүөлүүллэрэ көҥүллэммэт. - Бассейн да уутугар оҕону хайаан да кэтээн көрөр наада. Оҕолору уу кытыытыгар, күөлгө, өрүскэ уонна бассейннарга соҕотох хаалларымаҥ! Наар көрө-истэ, кэтии сылдьыҥ. - Кыра оҕолору дьиэҕэ соҕотох хаалларымаҥ. Испиискэни, умайар уонна уот ылар тэриллэри оҕо көрбөт, булбат сиригэр ууруҥ. - Уот турар (баһаар) түгэнигэр хайдах быыһанаары уонна төлөпүөнүнэн ханна эрийэри, дьиэттэн хайдах куотары эрдэттэн үөрэтиҥ. - Түннүктэри аһаҕас хаалларымаҥ. - Оҕолор велосипедынан, мопедынан уонна самокатынан сырыыларын кытаанахтык хонтуруоллааҥ. Суол быраабылатын тутуһуннара үөрэтиҥ, бырааба суох оҕону уруулга олордумаҥ. - Оҕо билбэт киһитин кытта кэпсэппэтэ, кинини кытта ханна да барбата — куттал суох буолуутун сүрүн ирдэбилэ буоларын үөрэтиҥ. Оҕолоргутун харыстааҥ, сэрэтии уонна өйдөтүү үлэтин ыытыҥ! «Нам улууһа” МО пресс-сулууспата