«Нам улууһа» МО дьаһалтата Саха Өрөспүүбүлүкэтин Быыһыыр сулууспатын (ГБУ РС(Я) «Служба... — 24 июля 2026 г. в 07:09:53.735
«Нам улууһа» МО дьаһалтата Саха Өрөспүүбүлүкэтин Быыһыыр сулууспатын (ГБУ РС(Я) «Служба спасения РС(Я)») уонна Саха сиринээҕи Гидрометеорология уонна тулалыыр эйгэни кэтээн көрүү управлениетын (УГМС) кытта биир ситимнээхтик, өрүскэ дохсун ардах уута киирэн уу таһыма үрдээһинин тохтоло суох кэтээн көрөр, сэрэтэр – өйдөтөр үлэни ыытар. Күүстээх ардахтар түспүттэрин түмүгүнэн, Нам улууһун сиригэр-уотугар оттуур ходуһалар уонна өрүс арыылара ууга барбыттара бэлиэтэнэр. Улуус сүрүн гидропостарыгар — Граф Биэрэгэр уонна Үөдэй нэһилиэктэригэр уу таһымын ураты хонтуруоллааһын (кэмнээһин) ыытыллар. Бүгүн, от ыйын 24 күнүгэр, күнүс 14 :00 чаастааҕы туругунан, «Нам улууһа» МО Биир кэлим диспетчерскэй сулууспата (ЕДДС) иһитиннэрэр: ✅ Үөдэй нэһилиэгэ: уу таһыма 595см (кутталлаах таһым — 873 см). Кэнники 6 чаас иһигэр уу +5 см эбилиннэ. ✅ Граф Биэрэгэ: уу таһыма 882 см (былаанынан кутталлаах таһым — 950 см, олохтоох туругунан — 1050 см). Кэнники 6 чаас иһигэр уу +6 см эбилиннэ. Уопсай балаһыанньа Саха Өрөспүүбүлүкэтин Быыһыыр сулууспатын уонна «Нам улууһа» МО дьаһалтатын ураты хонтуруолугар турар. Улуус нэһилиэктэригэр олорор дьиэлэри уу ылар таһыма критическэй отметкаттан намыһах. Уу ылыан сөптөөх намыһах сирдэри салгынынан көтөр дроннар көмөлөрүнэн кэтээн көрүү ыытыллар. Нэһилиэктэр дьаһалталарын күүһүнэн олохтоохторго сэрэтии-өйдөтүү үлэтэ тохтоло суох ыытыллар. Улуустааҕы ыксаллаах быһыыны-майгыны сэрэтэр, туоратар уонна баһаар куттал суох буолуутун хааччыйар хамыыһыйа (КЧС и ОПБ) сэрэтэр уонна ыҥырар: Ардах уута кэлэн уу үрдээбитинэн отчуттар, балыксыттар, сынньанааччылар уонна кыра суудналар (моторнай лодкалар) хаһаайыттара Өлүөнэ өрүскэ, намыһах ходуһаларга итиэннэ арыыларга киирбэккитигэр ыҥырабыт. Оҕолору уу кытыытыгар көрүүтэ-истиитэ суох уонна соҕотох хаалларымаҥ. Суһал эбэтэр кутталлаах балаһыанньа үөскээтэҕинэ, тута быыһыыр сулууспа нүөмэригэр эрийиҥ — «112» «Нам улууһа” МО Биир кэлим диспетчерскай сулууспата (ЕДДС) – 8(411 62) 45 - 508 «Нам улууһа» МО пресс-сулууспата