Юрий Петров, улуустааҕы тыа хаһаайыстыбатын управлениетын начальнигын солбуйааччы: — 28 июля 2026 г. в 04:27:35.066
Юрий Петров, улуустааҕы тыа хаһаайыстыбатын управлениетын начальнигын солбуйааччы: "Ардах уута оттооһуну атахтаата" Юрий Владимирович: - 2026 сылга улуус үрдүнэн оттооһун былаана 27 533 тн тэҥнэһэр. От ыйын 27 күнүнээҕи оперативнай сводканан, о.э.нэһилиэктэртэн киирбит дааннайдарынан улуус үрдүнэн 870,5 гектар сир охсулунна, 673,7 тонна от бэлэмнэннэ. Ол эбэтэр, оттооһун былаана улуус үрдүнэн 2,45 % туолан иһэр. 2025 сылга бу кэмҥэ 1864,8 тонна от бэлэмнэммитэ (быйылгы көрдөрүүттэн 1191,1 тоннанан элбэх). Быйыл ардахтаах дьыл буолан, өрүскэ уу таһыма күүскэ үрдээн, хочолор уонна намыһах сирдэр ууга бардылар, өрүс арыылара ууга сыталлар. Бу балаһыанньа оттуур ходуһаларга уонна өрүс арыыларыгар киирэр кыаҕы улаханнык хааччахтыыра, ону тэҥэ техниканан оттооһун хаамыытын уустугурдара сабаҕаланар. Улуус үрдүнэн оттуур сир уопсай иэнэ 32 183 гектарга тэҥнэһэр. Өрүс хочолоро, уу ылар хонуулара уонна арыылар 11 724 гектары, ол эбэтэр уопсай оттур сир иэнин 36,42 %-ын ылаллар. Хаалбыт 63,58 %-а алаастар уонна үрдүк ходуһалар, кытыл сирдэр. Уу таһыма үрдээһинин түмүгэр хаһаайыстыбалар быһаччы хоромньуга түбэстилэр: охсуллубут 80,5 гектар уопсай иэннээх сир (бэлэм охсуллубут от уонна рулоннар), итиэннэ 6,9 гектар хортуопуй сирэ ууга барда. Бу балаһыанньа хаһаайыстыбаларга улахан хоромньуну аҕалла уонна оттооһун үлэтин улаханнык атахтаата. Нэһилиэктэринэн ууга барбыт оттоммут сирдэр иэннэрэ: Хатырык — 14,5 га Партизан — 6 га Аппааны — 4 га Түбэ — 22 га Хамаҕатта — 25,5 га (34,8 тонна от), хортуопуй бааһыната — 6,9 га Бөтүҥ — 8,5 га Билигин отчуттар үөһээ сирдэргэ оттуу сылдьаллар, сорохтор күн - дьыл туругун көрөн дьэ тахсыталаан эрэллэр - диэн иһитиннэрдэ. «Нам улууһа» МО пресс-сулууспата