Атырдьах ыйын 4 күнүгэр Н.М.Рыкунов аатынан Намнааҕы кииннэммит библиотекаҕа улуустааҕы... — 5 августа 2026 г. в 05:07:14.078
Атырдьах ыйын 4 күнүгэр Н.М.Рыкунов аатынан Намнааҕы кииннэммит библиотекаҕа улуустааҕы дьахтар сэбиэтин мунньаҕа буолан ааста. Көрсүһүүнү дьиэ кэргэн уонна ыччат бэлиитикэтин отдела тэрийдэ. Мунньаҕы тэрээһин модератора, Нам улууһун дьахталларын сэбиэтин бэрэссэдээтэлэ Ирина Семеновна Винокурова иилээн-саҕалаан ыытта. Актив иннигэр тыл эттилэр СӨ дьахталларын сойууһун бэрэссэдээтэлэ Анжелика Егоровна Андреева; Аҕа дойду буойуннарын дьиэ кэргэттэрин кэмитиэтин Саха сиринээҕи ыстаабын солбуйааччыта Альбина Алексеевна Винокурова; Нам библиотекаларын кииннэммит ситимин директора, Аҕа дойду көмүскээччилэрин дьиэ кэргэттэрин улуустааҕы комитетын салайааччыта Майя Романовна Софронова. Дьахтар сэбиэтэ сыл устата былааннаах үлэнии ыытар. Ол курдук, араас хабааннаах тэрээһиннэргэ кыттан, кыһалҕалары көтөҕөн, ону быһаарарга үгүс үлэни ыыталлар; анал байыаннай дьайыы кыттыылаахтарыгар, дьиэ кэргэттэригэр көмөлөһөллөр; иистэнньэҥнэр, оҕуруоччуттар маастар кылаастарын ыыталлар уо.д.а. Тэрээһин улахан аҥарыгар аһаҕас дискуссия ыытыллынна. Кыттааччылар санааларын үллэстэн, долгутар бопуруостары көтөҕөн, этиилэри киллэрдилэр. Анал байыаннай дьайыы кыттыылаахтарын дьиэ кэргэттэрэ көрсөр ыарахаттарын туһунан кэпсэттилэр, СВО байыастарыгар таҥас-сап, экипировка тигэр "Илии сылааһа" аһымал хамсааһын халыҥ таҥаһы тигэр иистэнэр массыыналара, оверлоктара тиийбэттэрин, проводкалара үчүгэйдик үлэлээбэтин туһунан кыһалҕаны көтөхтүлэр. Маны таһынан дьахтар арыгылааһынын тиэмэтин уонна да атын улуус олохтоохторун долгутар кыһалҕаларын таарыйдылар. Тэрээһин уопсай зарядканан түмүктэннэ. Көрсүһүү кыттааччылара бииргэ сэргэхсийэргэ, чөл санааҕа, турукка туһууламмыт эрчиллиилэри оҥордулар. «Нам улууһа» МО Пресс-сулууспата