Ытыктабыллаах учууталлар, педагогическай үлэ бэтэрээннэрэ!
Ытыктабыллаах учууталлар, педагогическай үлэ бэтэрээннэрэ! Эһигини «Нам улууһа» муниципальнай оройуон дьаһалтатын уонна тус бэйэм ааппыттан идэлээх бырааһынньыккытынан – Учуутал күнүнэн итиитик-истиҥник эҕэрдэлиибин! Биһиги олохпут устата учууталларбытыгар, төрөөбүт оскуолабытыгар махтанабыт. Хас биирдии оҕо инники кэскилэ идэтин баһылаабыт педагогтан, муударай наставниктан улахан тутулуктаах буоллаҕа. Кинилэр биһиэхэ көннөрү билиини эрэ биэрбэккэ, үчүгэйгэ, сиэрдээх буолууга сыһыараллар, чиэс, иэс, төрөөбүт дойдубутугар таптал иэйиитин үөскэтэллэр. Убаастыыр учууталларбыт муударай сүбэлэрэ, үөрэтиилэрэ олохпут устатын тухары көмөлөһөллөр. Бүгүн Нам улууһун уопсай үөрэхтээһинин систематыгар 675 педагог үлэлиир. Саха сирин, улуус салалталара учууталлар государство, общество кыһамньытын билэллэрин туһугар элбэҕи оҥорорго кыһаллабыт. Бу барыта үүнэр көлүөнэни үөрэтиигэ, аныгы үөрэх эйгэтин тэрийиигэ, кинилэр дьоҕурдарын, талааннарын арыйыыга, сайыннарыыга анаан оҥоһуллар. Күндү учууталларбыт! Эһиэхэ күннээҕи сыралаах үлэҕит, таптыыр идэҕитигэр бэриниигит иһин, оҕолорбут туһугар кыһамньыгытыгар, тапталгытыгар истиҥ махтал тылларын этэбин. Дьолу-соргуну, этэҥҥэ буолууну, чэгиэн доруобуйаны уонна махталлаах үөрэнээччилэри баҕарабын! Ытыктабылы кытта, "Нам улууһа" муниципальнай оройуон баһылыга Юрий Иннокентьевич Слепцов