Хатырык оскуолатын үбүлүөйүн биир уратылаах түгэнинэн Выпускниктар галереяларын үөрүүлэ...
Хатырык оскуолатын үбүлүөйүн биир уратылаах түгэнинэн Выпускниктар галереяларын үөрүүлээх арыллыыта буолла. Бу бачыым оскуола директора Павел Петрович Тимофеев көҕүлэһиининэн олоххо киирдэ. Бырайыагы өйүүллэригэр ыҥыран оскуоланы бүтэрбиттэргэ видеонан ыҥырыы тахсыбыта. Бырайыак ааптарынан оскуола 2006 сыллаах выпускнига Петров Григорий Афанасьевич буолар. Атыттарга холобур буоллун диэн, оскуола бэйэтин үбүнэн 1957-1958 үө.дь. выпускниктарын туһунан бастакы планшеты оҥорторон ыйаабыта. Салгыы араас сыллаах выпускниктар үп хомуйан галерея силигин ситэрэллэр. Билигин да үлэ салгыы барар. Алтынньы 10 күнүгэр "Аартык аана" галерея үөрүүлээхтик арылынна. Бэлиэ түгэҥҥэ оскуола директора Павел Тимофеев, улуус үөрэҕин управлениетын начальнига Мария Игнатьева, Хатырык нэһилиэгин баһылыга Артур Ноговицын, оскуола выпускниктара олус долгуйан туран эҕэрдэлэрин тиэртилэр, үөрэммит сылларын истиҥник ахтан-санаан аастылар. "Нам улууһа" МО пресс-сулууспата