Алтынньы 10 күнүгэр киэн туттар биир дойдулаахпыт, Саха сирин уһулуччулаах государствен...
Алтынньы 10 күнүгэр киэн туттар биир дойдулаахпыт, Саха сирин уһулуччулаах государственнай уонна политическай диэйэтэлэ Максим Кирович Аммосов аатын сүгэр Хатырык орто оскуолата 95 сыллаах өрөгөйдөөх үбүлүөйүн бэлиэтээтэ! Бэлиэ даата алтынньыга саҕаламмыта. Алтынньы 10 күнүгэр сүрүн үөрүүлээх тэрээһин буолан ааста. Үбүлүөй чэрчитинэн араас көҕүлээһиннэр тэрилиннилэр: саахымат турнира ыытылынна, «Сайдам» сынньалаҥ киинигэр выпускниктар быыстапкалара үгүс киһини түмэ тарта, “Аартык аана” выпускниктар галереялара үөрүүлээхтик арылынна, кылаас чаастара бардылар. Эбиэттэн киэһэ «Сайдам» сынньалаҥ киинигэр “Ситим” оскуола театрын туруоруутугар «Үөрэх, билии сырдык суолунан» диэн спектакль көрдөрүлүннэ. Бырааһынньыктааҕы кэнсиэргэ ыалдьыттар дуоһуйа сынньаннылар. Кэтэхтэн ыытыллыбыт хоһоон, «Оҕо сааһым биһигэ - оскуолам» хаартыска күрэхтэрин кыайыылаахтарын чиэстээтилэр. “Үөрэммит кэрэ кэмнэрим” аһаҕас микрофоҥҥа выпускниктар оскуолатааҕы умнуллубат оҕо саас дьоллоох кэмнэрин ахтан-санаан аастылар. Баай устуоруйалаах үөрэх кыһата кэскиллээх үлэни тэрийэн, кэлэр көлүөнэни иитэр-үөрэтэр үтүө үгэһин салҕаан, туругура чэчирии сайыннын! Хатырык оскуолата, 95 сыллаах өрөгөйдөөх үбүлүөйгүнэн! Өр сыллар устата үгүс көлүөнэ ыччат ааспат ахтылҕана, махтала буолаҥҥын саҥаттан саҥа ситиһиилэргинэн кынаттана тур! Олохтоох студия салайааччыта Николай Поротов устуутун сэргии көрөргүтүгэр ыҥырабыт. “Нам улууһа” МО пресс-сулууспата