Хамаҕатта нэһилиэгин бааһынай хаһаайыстыбатын салайааччыта Александр Жирков анал байыан...
Хамаҕатта нэһилиэгин бааһынай хаһаайыстыбатын салайааччыта Александр Жирков анал байыаннай дьайыы кыттыылаахтарын дьиэ кэргэттэригэр оҕуруот аһынан көмөлөһөр үтүө үгэһин быйыл эмиэ салҕыыр. Ол курдук, улуус баһылыгын Юрий Слепцовы уонна улуустааҕы тыа хаһаайыстыбатын управлениетын специалиһа Анастасия Олесованы кытта кэпсэтэн, моркуобу хомуйууга 3 күннээх субуотунньук тэрийдэ. Биир бааһынаттан уопсайа 400-тэн тахса куул моркуоп хомуллан, 200-тэн тахсата буойуттарбыт дьиэ кэргэттэригэр, ордуга субуотунньуктаабыт дьоҥҥо түҥэтилиннэ. Улуус бары нэһилиэктэриттэн, сорох нэһилиэктэртэн 20-тэн тахсалыы киһи уонна Хамаҕатта саха-француз лиссиэйин 10 кылаас үөрэнээччилэрэ кэлэн көх-нэм буолбуттарын, субуотунньук кыттыылаахтара эһиил эмиэ кэлэн көмөлөһүөхпүт диэн баҕа санааларын тиэрдибиттэрин туһунан Александр Степанович биһигинниин санаатын үллэстэр. Александр улуус дьоно үөрэ-көтө кэлэн көхтөөх кыттыыны ылбыттарыгар, оттон буойуттарбыт дьиэ кэргэттэрэ амарах санаалаах салайааччы үтүөтэ Александр Жирковка, субуотунньуктаан көмөлөспүт биир дойдулаахтарыгар махтал тылларын тиэрдэллэр. Александр Степановичка бар дьонун махталыгар кыттыһан туран, дьиэ кэргэнигэр этэҥҥэ буолууну, быйаҥнаах бааһынаны, үрдүк үүнүүнү уонна дьоһун дохуоту баҕарабыт! Оҥорбут үтүөҥ бэйэҕэр сүүс төгүл үтүөнэн эргийэн кэллин диэн алгыс тылбытын аныыбыт! “Нам улууһа” МО пресс-сулууспата