«Масстрой» ХЭТ 3 эбийиэги тутар
«Масстрой» ХЭТ 3 эбийиэги тутар Күндээдэҕэ спортивнай саала тутуута саҕаламмыта хас да сыл буолла. Бу эбийиэк бастакы бэдэрээтчиттэрэ араас төрүөтүнэн үлэлэрин кыайбатахтарын кэннэ, быйыл улуус эрэллээх тутуу тэрилтэлэриттэн биирдэстэрэ – «Масстрой» ХЭТ итини ситэрэргэ ылыста. Эһиил манна СӨ норуоттарын IX Спортивнай оонньууларын икки көрүҥҥэ күрэхтэһиилэрэ ыытыллыаҕа, онон хайаан даҕаны күрэхтэһиини көрсө үлэҕэ киллэрэр соруктаахтар. «Масстрой» ХЭТ гендириэктэрэ Владислав Торохов кэпсииринэн, билигин эбийиэккэ 5 киһи үлэлии сылдьар. «Сэндвич-панельбыт собуокка уһуннук уочаракка сытан баран оҥоһулунна, ол иһин бытаардыбыт, — диир кини. — Эркинин сэндвич-панелларынан бүрүйэн баран түннүктэрин туруоруохпут. Быыстара, винтажнай аана, иһинээҕи ааннара эҥин бааллар. Эбийиэги бириэмэтигэр сөпкө үлэҕэ киллэрэр курдук, быйыл хойукка диэри үлэлии сатыахпыт». Итини таһынан «Масстрой» ХЭТ «Хаарбах дьиэлэртэн көһөрүү» бырагырааманан Ньурба к. Октябрскай уулуссатыгар, уруккута «Кэскил» оҕо уһуйаанын миэстэтигэр элбэх кыбартыыралаах дьиэни тута сылдьар. «Быйыл саҕалаатыбыт, билиҥҥитэ 30-тан тахса киһи үлэлиир. 98 кыбартыыралаах дьиэ буолар. Сыбаайатын түһэрэн бүтэрэн эрэбит. Дьиэ каркаһын монолитын кутан тохтоотубут. Билигин территорияны ыраастыыбыт, хомуйабыт, бу күннэргэ биригээдэ быйылгы үлэтин түмүктүөҕэ. Аны саас муус ыйыттан салгыы тутуохпут. 2027 с. ахсынньытыгар бүтэрэн үлэҕэ киллэриэхтээхпит». «Юнион» кинотеатр таһыгар саҥа киинэ тыйаатырын дьиэтин эмиэ «Масстрой» ХЭТ тута сылдьар. 8 киһилээх биригээдэ үлэлиир. Тымныйа илигинэ иннэ бетоннаммыта. Кинозал оҥоһуллар, вентиляция уонна ититии ситимэ тардыллар. Бу нэдиэлэҕэ түннүктэрин туруораллар. Саҥа дьыл иннинэ үлэҕэ киллэрэргэ былаанныыллар. Геннадий АНТОНОВ. @gazetanyurba @ulusmedia