Алтынньы үһүс баскыһыанньатыгар дойду үрдүнэн Суол хаһаайыстыбатын үлэһиттэрин күнэ бэл...
Алтынньы үһүс баскыһыанньатыгар дойду үрдүнэн Суол хаһаайыстыбатын үлэһиттэрин күнэ бэлиэтэнэр. Биһиги улууспутунан ааһар «Бүлүү» федеральнай таһымнаах айан суола хайдах туруктааҕын бары билэ-көрө сылдьабыт. Кэнники кэмнэргэ суолунан сырыы олус элбээн, араас уйуктаах массыыналар сырыылара үксээн, ордук саас уонна сайын суол уһун кэмҥэ алдьаныыта тахсара үгүс. Суол үлэһиттэрэ олус уустук балаһыанньаҕа үлэлииллэр. Сир аннынааҕы ирбэт тоҥ, климат уратыларын барытын учуоттаан тутуу барар. Сүрүн үлэлэрэ сайын уонна күһүн кылгас кэм иһигэр ыытыллар. 🛣2026 сыллааҕы үлэ-хамнас, туох өрөмүөн үлэтэ барбытын туһунан «РИК Автодор» генеральнай дириэктэрин солбуйааччыта Сергей Валерьевич Никифоровы көрсөн кэпсэттим. — Биһиги тэрилтэ 3 улуус суолун көрөбүт-истэбит: Бүлүү, Үөһээ Бүлүү уонна Ньурба, — диэн кэпсиир Сергей Валерьевич. — Бүлүү улууһугар сүрүннээн 260 м линейнай суоллары көрүү-истии үлэтэ күүскэ барда. Ону тэҥэ 300-чэ ууну аһардар турбалар, 1,5 тыһ. кэриҥэ суол бэлиэлэрэ, өрүһү, үрэхтэри аһардар муосталар эмиэ биһиги үлэһиттэрбит эппиэтинэстэригэр баар. Үөһээ Бүлүү улууһугар 609 килэмиэтиртэн 702 км Түүкээҥҥэ диэри учаастакка 10-тан тахса муоста, 100-чэкэ ууну аһардар турбалар, 600-чэкэ суол бэлиэлэрэ уонна кыһын мууһунан туорааһыннаах суол, сайынын паромунан туорааһын суолларын бэлэмниибит, көрөбүт-истэбит. Постовой-дорожнай оробуочайдар онно үрдүттэн олорон үлэлииллэр. Улуус иһигэр Кэнтик нэһилиэгэр 1 км аспаал суол оҥорбуппут, быйыл ситэрэн обочина оҥордубут, суол бэлиэлэрин туруордубут уонна суолга сытыары бэлиэ түһэрдибит. Обьект бүттэ. Ороһуга 1 км кэриҥэ суол аспаалланна. Баһыйар өттө бүттэ, эһиилгигэ суол бэлиэтин туруорааһын курдук кыра үлэ хаалла. Бары истэ-билэ сылдьарбыт курдук, 2024 сыллаахха уһун күүстээх ардахтар Үөһээ Бүлүү улууһугар 660-тан 678 км диэри айан суола Чаллыр диэн сиргэ, ол аата өрүстэн Хороҕо диэри суол улаханнык алдьанан турар. Онно эбии өрүс халааннаан уу суолу үрдүнэн таһымнаан 1 ый устата уу суол үрдүгэр сыппыта. 5,8 м нуорматтан үрдүк этэ. Сакаасчыт «Бүлүү» УпрДор ити 10 килэмиэтирдээх учаастак оҥоһуутугар бырайыак оҥорон аукцион ыыппытыгар биһиги тэрилтэ кыайаммыт быйыл үлэбитин саҕалаатыбыт. Бу сайын 3,5 км саамай ууга барбыт учаастакка элбэх үлэ барда. 60 тыһ.куб буор таһылынна, суол олоҕо туруктаах буоллун диэн щебень, ПГС, буор буккуйан 25 см суол бүрүөһүнүн оҥордубут. Быйыл аан маҥнай Саха сиригэр «Бүлүү» федеральнай суолга суол эниэтигэр уу мунньуллан хонон суолу кэбирэтэр сиригэр бетобокс диэн олус бөҕө синтетическэй матырыйаалы тутуннубут. Бу атын регионнарга федеральнай суолларга туттуллар ньыма. Үөрэтэн баран Тула куораттан сакаастаан аҕалтаран, сыаната даҕаны удамыр, Үөһээ Бүлүүгэ саамай уустук учаастакка тэлгэттибит. Боростуойдук быһаардахха, бу аныгы матырыйаалга үрдүнэн кумахтаах цемеҥҥэ анал добавка эбэн буккуйан куттубут. Олус бөҕө, уһун үйэлээх биир кэлимсэ бетон билиитэтэ буолан хаалар. Онтубут эһиил хайдаҕын көрүөхпүт. Сылаас кэмнэри баттаһа былааннаах 10 килэмиэтиртэн 3,5 км оҥорон бүттүбүт. Сиһилии саайтка ааҕыҥ: https://xn--90adptbcs3gya.xn--p1ai/ajan-syryy-syly-ergichchi-baar-buolaryn-tu%d2%bbugar/ @gazetanyurba @ulusmedia