«Чэчирээ, чэлгий күөх Тааттам!»: Ытык Күөлгэ Экология күнүн үөрүүлээхтик бэлиэтээтилэр — 5 июня 2026 г. в 04:16:52.613
«Чэчирээ, чэлгий күөх Тааттам!»: Ытык Күөлгэ Экология күнүн үөрүүлээхтик бэлиэтээтилэр 🌿Бүгүн, бэс ыйын 5 күнүгэр, Аан дойдутааҕы тулалыыр эйгэ харыстабылын уонна Экология күнүн чэрчитинэн, Ытык Күөл нэһилиэгин А.Е. Кулаковскай – Өксөкүлээх Өлөксөй аатынан скверигэр «Чэчирээ, чэлгий күөх Тааттам!» диэн сэргэх тэрээһин буолан ааста. 🌿🌾Тэрээһин сарсыарда олохтоохтор уонна ыалдьыттар ортолоругар сибэкки уонна оҕуруот аһын рассадатын атыытыттан сэргэхтик саҕаланна. Мустубут дьону-сэргэни Таатта улууһун баһылыгын социальнай боппуруостарга солбуйааччыта Никифор Жерготов истиҥник эҕэрдэлээтэ. Кини бэйэтин тылыгар тулалыыр эйгэни харыстааһын уонна төрөөбүт дойдуну тупсарыы хас биирдии киһи ытык иэһэ буоларын бэлиэтээтэ. 🌿Күн сүрүн түһүмэҕинэн сквер иһигэр декоративнай талахтары олордуу буолла. Бу үтүө дьайыыга көлүөнэлэр ситимнэрин көрдөрөн, улуус маанылаах ыаллара көхтөөхтүк кытыннылар. Ол курдук, 50 сыл бииргэ олорбут ытык ыаллар: Архиповтар, Кузьминнар, Варламовтар, Винокуровтар, Будикиннар, Христофоровтар уонна кинилэри кытта тэҥҥэ эдэр ыаллар Саввиннар, Софроновтар акация талахтарын олордон, нэһилиэк тупсарыгар бэйэлэрин кылааттарын киллэрдилэр. 🌿Маны сэргэ тэрээһин иһинэн хас да туһалаах тэрээһиннэр ыытылыннылар: • «Туһалаах хаппахтар» ааксыйа чэрчитинэн, оҕолор уонна улахан дьон аҕалбыт хаппахтарын анаан оҥоһуллубут иһиккэ уктулар. • «Садовое творчество» түмсүү айар үлэтин быыстапката дьон болҕомтотун тарда. Бу курдук, «Чэчирээ, чэлгий күөх Тааттам!» тэрээһин айылҕаны харыстыырга эрэ буолбакка, дьон-сэргэ биир сомоҕо буолан дойдутун тупсарарга баҕатын өссө төгүл бигэргэттэ. @taattaadm