Олоххо дьулуур холобурдара: Таатта хамаандата өрөспүүбүлүкэтээҕи «Дьулуур» спартакиадаҕ... — 15 июня 2026 г. в 10:41:02.519
Олоххо дьулуур холобурдара: Таатта хамаандата өрөспүүбүлүкэтээҕи «Дьулуур» спартакиадаҕа турунна 🌿Доруобуйаларынан хааччахтаах дьон олоххо күүстээх дьулуурдарын, кыахтарын уонна булгуруйбат майгыларын көрдөрөр өрөспүүбүлүкэтээҕи «Дьулуур» спартакиада быйыл 15-с төгүлүн ыытыллар. Бу сүҥкэн суолталаах успуорт бырааһынньыга Дьокуускай куоракка бэс ыйын 16–19 күннэригэр буолуоҕа. Биһиги улууспут албан аатын чиэстээхтик көмүскүүр сыаллаах, Надежда Белолюбская уонна Светлана Дорофеева салайааччылардаах 67 киһилээх улахан хамаандабыт бэлэмнэнэн, бүгүн айан суолугар турунна. ✨ Атаарыы сиэрин-туомун алгысчыт Парасковья Петрова — Күн Чөмчүүнэ уот уматан алҕаата, спортсменнарбытыгар айаннарыгар уонна күрэхтэһиигэ этэҥҥэ сылдьалларыгар анаан сылаас алгыһын иҥэрдэ. Улуус баһылыга Айаал Бурцев спортсменнарбытыгар кыайыылаах-хотуулаах сырыыны, ситиһиилээх уонна көхтөөх кыттыыны баҕаран туран айан дьонун атаарда. 🏃♂️ Күрэхтэһии спорт адаптивнай 8 ураты көрүҥэр ыытыллыаҕа. Күрэххэ кыттааччылар эрчийээччилэригэр ураты махталларын тиэртилэр. Тренердэр анал бириэмэ таһааран, спорт уораҕайдарыгар хас биирдии спортсмены бэрт таһымнаахтык уонна сыралаахтык бэлэмнээтилэр. Наардаан эттэххэ, ааспыт улахан спартакиадаҕа Тааттабыт сүүмэрдэммит хамаандата бочуоттаах 5-с миэстэни ылан турар. Быйылгы «Дьулуурга» кыттар биир дойдулаахтарбытыгар өссө үрдүк ситиһиилэри, күүстээх санааны уонна чаҕылхай кыайыылары баҕарабыт! Таатта дьоно-сэргэтэ бары биир киһи курдук бэйэбит дьоммутун өйүөххэ уонна кинилэргэ эрэниэххэ! @taattaadm