Кӱндӱлӱ јерлештер! Оҥдой аймактыҥ эл-јоны!
Кӱндӱлӱ јерлештер! Оҥдой аймактыҥ эл-јоны! Ӱлӱрген айдыҥ 20-чи кӱни Алтай Республикабыста тӧрӧл алтай тилдиҥ Кӱни деп чотолот. Бу јакшынак байрамла ончогорды уткуп турум! 2014 јылда мындый баштаҥкайды Алтай Республиканыҥ Эл Курултайы улу алтай бичиичи, поэт Лазарь Васильевич Кокышевтиҥ чыккан кӱниле колбогоны јарамыкту болот. Алтай тил – ол калыгыстыҥ ойгор кӧгӱс-байлыгы, јаандарыстыҥ јанчыкка салып берген энчизи. Тилисти чеберлеп корыырында ла ичкери ӧзӱм алынарына кажы ла кижиниҥ јӧмӧлтӧзи тузалу. Јайалталу бичиичилердиҥ, шиҥжӱчилердиҥ, ӱредӱчилердиҥ ле ӧскӧ дӧ улустыҥ эрчимдӱ јайаан иштери учун, алтай тилдиҥ келер ӧйи јаркынду болуп ӧзӧр деп иженедим. Тилистиҥ байыла, чечениле оморкоп, мынаҥ да ары кичееп ле ӧскӱрип, оморкоп, алтай тилисле куучындап јӱректер. Алтай тилис тирӱде, алтай албаты ӧҥжип ӧзӧр. Акту кӱӱнимнеҥ ончогорды байрамла уткуп, бек су-кадык, билегерде амыр-энчӱ, јеткил јадын-јӱрӱм кӱӱнзейдим! Албатымныҥ айткан санаазы – сен, Амадап јӱрген – кожоҥы сен. Адамныҥ арткан јӧӧжӧзи – сен, Энемниҥ берген – энчизи сен. Оҥдой аймактыҥ јааны Р.Н. Байдалаков