Администрация СП "Береляхский наслег" МР "Аллаиховский улус (район)" РС (Я)
Новости · 26 мая 2026 г.
Сырдыгы, билиини тарҕатан — 26 мая 2026 г. в 23:04:52.826
Сырдыгы, билиини тарҕатан Аллайыаха оройуонугар 1940 сыл кэнниттэн ааҕар балаҕаннар аһылланнар үлэлээн барбыттара. Ордук айымньылаахтык 1950-с сыл кэнниттэн үлэ барбыта. Ол кэмнэргэ хас биирдии үлэһит үлэтигэр суобастаахтык, актыыбынайдык үлэлээбитин архыып докумуоннарыттан билэбин. Бөрөлөөх нэһилиэгин библиотекатыгар 80 сыл устатыгар элбэх киһи үлэлээн кэллэ. Ордук библиотека үлэтин 1979 сылтан билэбин. Бу сылтан кииннэммит библиотека ситимэ олоххо киирбитэ. Кинигэ уонна ааҕааччы икки ардыларыгар өссө чугаһаан ааҕыы таһымын, үлэ сайдыытын саҥа кэрдиискэ таһаарбыта. Ити сылтан тыа сирин библиотекалара филиал диэн ааттанар буолбуттара. Оройуоннааҕы киин библиотека үлэһиттэрэ методическай, библиографическай, практическай көмөлөрү оҥорорбут. Эбии комплектование, обработака уонна көһө сылдьар библиотека диэн отделлар аһыллыбыттара. Биир кэлим кинигэ фондатын тэрийии үлэтэ барара. Нэһилиэк аайы библиотекарь идэтин баһылаабыт үлэһиттэр анаммыттара. Бөрөлөөх нэһилиэгин библиотекатыгар олохтоох библиотекарь Людмила Васильевна Колесова бу саҥа хайысхалаах үлэҕэ үлэтин көхтөөтүк саҕалаабыта. Араас тематическай биэчэрдэри, суруйааччылар кинигэлэригэр быыстапкаларын, ааҕааччылар конференцияларын, «Книголюб» куруһуогу тэрийэн улахан дьон уонна оҕолор кинигэни сөбүлээн ааҕалларын ситиспитэ. Ити курдук библиотека бэйэтин кыаҕынан нэһилиэнньэ араас араҥатыгар септеех, туһалаах информациялары биэрэр киининэн буоларын олохтоохтор бэркэ билэллэрэ. Хас биирдии ааҕааччытын интэриэһин билэр буолан олохтоох библиотекарь Людмила Васильевна Колесова ыытар тэрээһиннэрэ дьон интэриэһин тардара. Кэлиҥҥи кэмҥэ библиотекаҕа Колесова Наталья Ивановна кинигэни, хаһыаттары, сурунааллары ааҕалларын ситиһэн, маны таһынан «Патриот» түмсүүнү тэрийэн, эдэр ыччат уонна оҕолор ортолоругар патриотическай, краеведческай хайысхаларга эмиэ көхтөөхтүк үлэлээбитэ. Үбүлүөйдээх бэлиэ сылынан уонна Россияҕа библиотека күнүнэн олохтоохтору уонна бииргэ үлэлээбит библиотекардарбын Людмила Васильевнаны, Наталья Ивановнаны уонна билигин үлэлии олорор Аяна Николаевнаны эҕэрдэлиибин! Главнай библиотекарь, Маргарита Ивановна Иванова.