Администрация СП "Береляхский наслег" МР "Аллаиховский улус (район)" РС (Я)
Новости · 26 мая 2026 г.
Аллайыаха улууһун Бөрөлөөх нэһилиэгэр ааҕар балаҕан тэриллибитэ 80 сыллаах бэлиэ түгэни... — 26 мая 2026 г. в 23:02:35.433
Аллайыаха улууһун Бөрөлөөх нэһилиэгэр ааҕар балаҕан тэриллибитэ 80 сыллаах бэлиэ түгэнинэн сибээстээн, бэйэм үлэлээбит кэмнэрбиттэн ахтыыбын үллэстэбин. 1979 сыллаахха өрөспүүбүлүкэбит үрдүнэн бары библиотекалар биир ситимҥэ киирбиппит. Ол курдук, «Аллаиховская межпоселенческая централизованная библиотечная система» диэн ааттанан, Чокурдаах бөһүөлэгин киин библиотекатыгар оҕо уонна 5 нэһилиэк – Бөрөлөөх, Быяҥныыр,Оленегорск, Русское Устье, Похвальнай библиотекалара холбоһон үлэлиир буолбуппут. Бу ситим салайааччытынан Мыськив Нина Ивановна анаммыта. Ол кэмҥэ мин методист дуоһунаһыгар үлэлиирим. Хайаан даҕаны сылга иккитэ нэһилиэктэри кэрийэн үлэ хаамыытын кытта билсэрбит. Библиотекалар кинигэннэн, сурутууннан хааччыллыыларын, пуондун каталогтарга киллэрии үлэтэ барара. Маны таһынан үлэһиттэри кытта уоппут атастаһыыта, методическай көмө оҥоһуута ыытыллара. Аан бастаан Бөрөлөөххө барбыппын өйдүүбүн, эдэр үлэһит Людмила Колесова кэтэхтэн үөрэнэн бүтэрэн үлэлиир этэ. Библиотека кулуубу кытта биир дьиэҕэ бааллара. Буочукаттан оҥоһуллубут оһохторунан ититтэн, күн аайы 5 оһоҕу оттор маһы субуотунньуктарынан кыайаллар эбит этэ. Ол саҕана нэһилиэнньэ ахсаана 200–тэн тахса буолааччы. Элбэх дьиэ кэргэнинэн ааҕааччылардаах, ону таһынан ыраах булт учаастактарыгар, таба иитэр ыстаадаларга тиһигин быспакка кинигэннэн хааччыллыыларыгар улахан болҕомтону ууран библиотека куруук ситиһиилээхтик үлэлээбитэ. Ол кэмтэн ыла Людмила Васильевна сынньалаҥҥа тахсыаҕар диэри уопсайа 38 сыл устата нэһилиэгин олохтоохторун ааҕарга угуйан, араас интэриэһинэй тэрээһиннэри ыытан үлэлээбитэ. Ол саҕаттан ыла библиотека кыраайы үөрэтэр үлэтэ биллэр – көстөр этэ. Нэһилиэккэ билигин даҕаны бэтэрээннэр олохторун, ааттарын, үйэтитии үлэтэ күүскэ барара көстөр. 1992 – 2018 сс. Аллайыха улууһун библиотекаларын дириэктэрэ Серафима Васильевна Стрюкова