Саха сирин бибилэтиэкэлэригэр, Ил Дархан Айсен Николаев соругунан, оҕо төрөөбүт тылынан... — 21 мая 2026 г. в 09:47:48.798
Саха сирин бибилэтиэкэлэригэр, Ил Дархан Айсен Николаев соругунан, оҕо төрөөбүт тылынан ааҕыытын көҕүлүүр кииннэр тэриллэн үлэлииллэр. Билигин кииннэр ситимнэрин олохтуур үлэ бара турар. Ол курдук, 2026 сыл ыам ыйын көрдөрүүтүнэн, өрөспүүбүлүкэ үрдүнэн 324 киин 32 улууска уонна Дьокуускай куоракка аһыллан үлэлэрин саҕалаатылар. Мантан 5 киин эбээн, эбэнки тылынан ааҕыыга Алдан, Өймөкөөн, Булуҥ, Кэбээйи улуустарыгар аhылыннылар. Бу улахан бырайыагы СӨ Национальнай бибилэтиэкэтин дириэктэрин солбуйааччыта Светлана Попова уонна Оҕо ааҕар, аһыллар киинин үлэһитэ Константин Неустроев иилээн-саҕалаан, салайан ыыталлар. Бу аhыллыбыт кииннэр саха тылын эрэ буолбакка, хотугу аҕыйах ахсааннаах норуоттар тылларын үөрэтиигэ улахан болҕомтону эмиэ ууруохтара. Oлунньу 13 күнүгэр, Төрөөбүт тыл, сурук-бичик күнүн бэлиэтиир үөрүүлээх тэрээһинигэр СӨ Бырабыыталыстыбатын бэрэссэдээтэлин солбуйааччыта Сергей Местников «Оҕо төрөөбүт тылынан ааҕыытын тарҕатар бастыҥ киин» өрөспүүбүлүкэтээҕи күрэҕи биллэрбитэ. Күрэх төрөөбүт тылы харыстыыр уонна сайыннарар судаарыстыбаннай бырагыраама чэрчитинэн олунньу 13 күнүттэн балаҕан ыйын 7 күнүгэр диэри ыытыллар. Оҕо төрөөбүт тылынан ааҕар интэриэһин уһугуннарар, саха литэрэтиирэтин уһулуччу айымньыларын билиһиннэрэр, ааҕыы култууратын оҕоҕо иҥэрэр сыаллаах-соруктаах тэриллэр кииннэр үлэлэрэ ситиһиилээх, үтүө түмүктээх буолуо диэн эрэнэбин. Афанасий Ноев