I Тыыллыма нэһилиэгэр — 18 июня 2026 г. в 06:04:30.859
I Тыыллыма нэһилиэгэр Гавриил Васильевич Никифоров – Манньыаттаах уола төрөөбүтэ 155 сылыгар анаан ыччат олоҥхоһуттар түһүлгэлэрэ төрүттэннэ Oлоҥхону толорооччу, СӨ Дархан оһуохайдьыта, Олоҥхо ыһыахтарын кылаан кыайыылааҕа, СӨ култууратын туйгуна Виталий Витальевич Никифоров салайыытынан, А.М. Алексеев аатынан Лоомтука сынньалаҥ киинин үлэһиттэрин бырайыага биһирэнэн, ханна да буола илик ураты «Гавриил Васильевич Никифоров – Манньыаттаах уолун олоҥхоҕо хоһуйуохха» күөн күрэс тэрилиннэ. Икки күн устата ытык Тыыллыма сиригэр устар ууну сомоҕолуур тыллаахтар илин-кэлин түсүһэн, олоҥхо омуна оргуйан олордо. Бастакы күн, ыраахтан-чугастан мустубут олоҥхону толорооччулар бэйэлэрэ тута сылдьар олоҥхолорун толордулар. Манна, дьүүллүүр сүбэ эдэр дьон түөлбэ олоҥхолорун тута сылдьалларын, толорууларыгар олуктар толоруларын ону сэргэ олоҥхо тойуктара элбэҕин кэрэхсээтилэр. Чурапчыттан төрүттээх Олоҥхо тыйаатырын артыыската Анастасия Алексеева уонна Мэҥэ Хаҥаластан кыттыбыт СӨ Дархан оһуохайдьыта Станислав Иванов бэйэлэрин олоҥхолорун толорон, умуллан испит кулуһун уота быстыбатаҕын, олоҥхо үйэлээх үгэһэ тыыннааҕын туоһулара буоллулар. Иккис күн 1 гильдиялаах атыыһыт, меценат, үөрэҕи тарҕатааччы, император эргиэҥҥэ сүбэһитэ, бочуоттаах инородец Гавриил Васильевич Никифоров – Манньыаттаах уолун төрөөбүтэ 155 сылыгар аналлаах үбүлүөйдээх Үрүҥ тунах ыһыах ыһылынна. Күрэскэ оҕолорго барыларыттан бастыҥынан Нам улууһуттан Юра Мордовской ааттанна. Маҥнайгы үрдэл аатын Аллараа Бэстээх бөһүөлэгиттэн Күннэй Дмитриева, иккис үрдэл Нам улууһуттан Эвилья Шадрина ааттанан, оҕолор бары сыаналаах бириистэринэн наҕараадаланнылар. Ыччат олоҥхону толорооччуларга истээччилэр бука бары болҕомтолорун тутан, кэрэхсэбиллэрин кэҥэтэн Мэҥэ Хаҥалас улууһуттан Станислав Иванов ааттанан аатын өссө үрдэттэ. Бу күрэскэ Станислав бэлэмнээх, Манньыаттаах уолун туһунан ааҕан, чинчийэн кэлбитэ тута харахха быраҕылынна. Маҥнайгы үрдэл аатын Чурапчыттан Анастасия Алексеева, иккис үрдэл аатын Горнай улууһуттан Айталыын Винокуров, үһүс үрдэл аатын Бүлүүттэн Сайыына Шамаева ылан Манньыаттаах сыдьааннарыттан маанылаах бириистэри туттулар. Мэҥэ Хаҥалас улууһуттан Марфа Аммосова, Амматтан Егор Никифоров, Уус Алдантан Диана Петухова, Бүлүүттэн анал биһирэбилинэн бэлиэтэннилэр. Дойдубут уонна биир дойдулаахтарбыт ааттарын үйэтитэргэ бу курдук үлэни ыытаргыт иһин махталбын өссө төгүл тиэрдэбин! Афанасий Ноев