Уус Алдаҥҥа үлэбинэн бара сылдьан, улуустааҕы Сэһэн Ардьакыап аатынан — 27 июля 2026 г. в 09:18:34.659
Уус Алдаҥҥа үлэбинэн бара сылдьан, улуустааҕы Сэһэн Ардьакыап аатынан кыраайы-устуоруйаны үөрэтэр түмэл бырайыактарын олус сэргээбитим. Түмэл устуоруйаны үөрэтэр, чинчийэр уонна үйэтитэр сыаллаах тэрилтэ буоларын быһыытынан, сүрүн сыала хас биирдии киһи улууһун туһунан билэр кыаҕын сөптөөхтүк тэрийии буолар. Бу сыалы ситиһэргэ улуус дьаһалтата улахан болҕомтону уурар. Ол курдук, Сэһэн Ардьакыап аатынан Уус Алданнааҕы кыраайы-устуоруйаны үөрэтэр түмэл бырайыактара Ил Дархан уонна дойду Бэрэсидьиэнин граннарын өйөбүллэринэн саҥа, сонун экспозициялары олоххо киллэрэр, тэрээһиннэри тэрийэн ыытар. Олор истэригэр Уус Алдан улууhа тэриллибитэ 100 сылын көрсө түмэл кыра саастаах оҕолорго анаан улуус устуоруйатын билиһиннэрэр «Ороойко» диэн ойуулук бырайыагы олоххо киллэрдэ, билигин номнуо 8-с таһаарыыта дьон көрүүтүгэр таҕыста. Ойуулук сахалыы тылынан оҕолорго тиийимтиэ гына олус сэргэхтик оҥоһуллубут, ойуута, уруһуйа да дьэрэкээнэ сөхтөрөр. Оҕолор бу ойуулугу олус сөбүлээтилэр, саҥа сиэрийэ тахсарын долгуйа күүтэллэр диэн үлэһиттэр кэпсииллэрин үөрэ истибитим. Түмэл үлэһиттэригэр айымньылаах үлэлэригэр үрдүк ситиһиилэри, саҥаттан саҥа бырайыагы олоххо киллэрэн иһэллэригэр, дьону-сэргэни үтүөҕэ-кэрэҕэ, үөрэххэ, сырдыкка угуйа туралларыгар баҕарабын! Афанасий Ноев