Сайыҥҥы үтүө күннэри баттаһа, Амма улууһун биир улахан нэһилиэгэр Болугурга сылдьан, үл... — 3 августа 2026 г. в 07:43:44.572
Сайыҥҥы үтүө күннэри баттаһа, Амма улууһун биир улахан нэһилиэгэр Болугурга сылдьан, үлэни-хамнаһы көрдүм. М.А. Ноговицын аатынан култуура киинин үлэһиттэрэ, дириэктэр Ульяна Юдовна Кузьмина, уус-уран салайааччы Евдокия Васильевна Платонова нэһилиэк култууратын сырдатан, «Кулун Атах култуурата. Сырдыктааҕы кэм» диэн улахан бырайыактарын тула үгүс үлэлэрин билиһиннэрдилэр. Ол курдук, Болугур нэһилиэгин олохтоохторун күүһүнэн, норуот көҕүлээһинин бырайыагынан (ППМИ) тутуллубут «Туос ураһа» силигин ситэн бүтэн турар кэмигэр сэргии көрдүм. Бу улахан тутуу нэһилиэк олохтоохторо бука бары биир санаанан үс сыл тухары үлэлэһэн кэлбит кыайыылара буолар. Сүрүн көҕүлээччинэн М.А. Ноговицын аатынан култуура киинэ, олохтоох дьаһалта баһылыга Андрей Никитич Петров, СӨ норуотун маастардара Степан Прокопьевич Устинов, Клавдия Алексеевна Новикова, Егор Иннокентьевич Федотов, уус-уран оҥоһуктар маастардара Ульяна Ивановна Иванова, Ульяна Майродовна Михайлова – Маай кыыһа, Изабелла Васильевна Гаврильева, «Арчылаана», «Чөмчүүк» эбэлэр түмсүүлэрэ, нэһилиэк тэрилтэлэрин үлэһиттэрэ буолаллар. Маны таһынан, култуура киинин иһигэр балаҕан хоско турар, Болугур нэһилиэгин уран тарбахтаах дьонун быыстапкатын көрөн олус сэргээтим. Бу быыстапкаҕа мас чороонтон саҕалаан, туой иһиттэргэ, туос оҥоһуктарга, саха үнүстүрүмүөнүгэр тиийэ баар. «Кулун атах култуурата. Сырдыктаа5ы кэм» бырайыак XII үйэтээҕи сылгы, сүөһү дьарыктаах саха норуотун иһитин-хомуоһун Болугур туойуттан үтүгүннэрэн оҥорбут норуот маастара Устинов Степан Прокопьевич оҥоһуга киэргэтэр. Нэһилиэк сынньалаҥ пааркатыгар сылдьан, 2023 сыллаахха Амма улууһугар Олоҥхо ыһыаҕын көрсө ыытыллыбыт өрөспүүбүлүкэтээҕи мас уустарыгар «Олоҥхо геройдарын уобарастара» диэн маһынан кыһыллан, чочуллан оҥоһуллубут күрэх оҥоһуктарын көрдүбүт. Маны таһынан, Е.Е. Пахомов аатынан Болугур орто оскуолатын иһинэн үлэлиир «Тускул» түмэлгэ сылдьан, нэһилиэк устуоруйатын сэргии иһиттим. Ол кэннэ Болугур нэһилиэгин Бочуоттаах олохтооҕор, СӨ норуотун маастарыгар Устинов Степан Прокопьевичка сылдьан, айар-тутар туой иһит мастарыскыайын көрдүм, маастар үлэтин-хамнаһын кэпсээтэ, инники былааннарын үллэһиннэ. Болугур уустара саха омук төрүт култууратын баай нэhилиэстибэтин – норуот уус-уран оҥоhуктарын үйэтитэр уонна сайыннарар ытык аналларын чиэстээхтик толороллор, айымньылаахтык үлэлииллэр. Бу курдук саха култуурата, итэҕэлэ, норуотун баайа куруук сайда, кэнчээри ыччакка тиийэ турдун! Афанасий Ноев